ԵՐԵՎԱՆ, 28 մայիսի — Sputnik. Հայաստանում ոստիկանացված պետության առկայության հարցը բարձրացնում են նրանք, ովքեր պատճառներ ունեն վախենալու իրավապահ մարմիններին, Սարդարապատում լրագրողներին ասաց ՀՀ ոստիկանապետ Վլադիմիր Գասպարյանը:
«Ոստիկանացված պետության մասին կարող են խոսել մարդիկ, որոնք սարսափելու տեղ ունեն ոստիկանությունից: Իսկ դուք չեք համարո՞ւմ, որ ոստիկանը առավոտից առավոտ ծառայում է, օգնություն է ցույց տալիս քաղաքացիներին: Եթե դա ոստիկանական պետություն է, ես այդ ոստիկանական պետության կողմնակիցն եմ», — ասաց Գասպարյանը:
Մեկնաբանելով այն հարցը, թե ինչու է ոստիկանների թիվը գաղտնի պահվում, նա նշեց, որ դա ոստիկանապետից կախված չէ:
«Այդ օրենքը ժամանակին ընդունել են պատգամավորները, որոնք այդ հարցը բարձրացնում են», — ասաց Գասպարյանը:
Խոսելով լրագրողներն վիրավորելու մասին՝ Գասպարյանը նշեց, որ ոչ մեկին չի վիրավորել:
«Ես լրագրողին չեմ վիրավորել, ընկալման խնդիրներ են», — ասաց Գասպարյանը:
Լրագրողի հետ կապված միջադեպը տեղի էր ունեցել Ծիծեռնակաբերդում: Ոստիկանապետը լրագրողին ասել էր, որ նրա մեջ կին չի տեսնում:
