ԵՐԵՎԱՆ, 27 մայիսի — Sputnik. «Փոքր Մհեր» և «Մոնթե Մելքոնյան» կրթահամալիրներում կազմակերպված տոնական միջոցառումներին ներկա էր նաև ՀՀ պաշտպանության նախարարության բարձրագույն ղեկավարությունը։
Միջոցառումները մեկնարկեցին մեկ րոպե լռությամբ` ի հիշատակ քառօրյա պատերազմում զոհված հերոսների։ Զոհվածների ցանկում է նաև «Փոքր Մհեր» կրթահամալիրի շրջանավարտ, ավագ լեյտենանտ Բենիամին Եղոյանը։
«Մեր ապագան ձեր ձեռքերում է, պրոֆեսիոնալ բանակի ապագան ձեր ձեռքերում է, քանի որ դուք ընտրել եք սպայի հերոսական մասնագիտությունը։ Հայ ժողովուրդը, մեր ծնողներն ու բարեկամները ձեզանից հերոսություն են սպասում», — դիմելով շրջանավարտներին` ասաց Օհանյանը։
Նրա խոսքով` ընդունված է ասել, որ հայրենիքը սկսում է սահմաններից, իսկ այդ սահմաններին զինվորներն են, ամբողջ բանակային կազմը, որի հիմքը դպրոցների և կրթահամալիրների շրջանավարտներն են։
Օհանյանն ընդգծեց, որ հայերը գեներալներ և մարշալներ ծնող ժողովուրդ են, որոնք Երկրորդ համաշխարհային պատերազմի ժամանակ կարողացան իրենց գիտելիքների շնորհիվ հասնել մինչև Բեռլին։
«Մեր պապերը մեզ հաղթանակ շնորհեցին, իսկ մեր հասակակիցներն ազգին եռակի տոն պարգևեցին` հաղթանակը, Շուշիի ազատագրումն ու Պաշտպանության բանակի ձևավորումը, որի շարքերում նաև ուսումնարանի շրջանավարտներ են ծառայում», — նշեց նախարարը։
Կրթահամալիրի սաները ցուցադրական համարներ էին պատրաստել միջոցառման ներկաների համար։
«Փոքր Մհեր» կրթահամալիրի 35 շրջանավարտները ապագայում հավանաբար կհամալրեն հայ սպաների շարքերը։ Այս տարի կրթահամալիրը տոնում է հիմնադրման 15-ամյակը։ Այժմ մոտ 40 սան սովորում է ռազմական ինստիտուտներում, նրանցից 27-ը` Վազգեն Սարգսյանի անվան ռազմական ինստիտուտի կուրսանտներ են, 13-ը` սովորում են Արմենակ Խանփերյանցի անվան ռազմական ավիացիոն ինստիտուտում, ևս 7-ն ուսում են ստանում Ռուսաստանում և Իտալիայում։
Եվս 69 սան էլ իր ուսումն ավարտեց «Մոնթե Մելքոնյան» ռազմական վարժարանում։ Նրանցից 94-ը ուսումը կշարունակի Հայաստանի ռազմական ինստիտուտներում և արտասահմանում (Իտալիա, Ռուսաստան, Հունաստան, Ֆրանսիա և Գերմանիա)։
Ինչպես նշեց Հայաստանի պաշտպանության փոխնախարար Դավիթ Տոնոյանը, այս երիտասարդության մայրաքաղաքը ո՛չ Ռուսաստանն է, ո՛չ Բրյուսելը և ո՛չ էլ Վաշինգտոնը, այլ` անկախ Հայաստանը։
«Նրանք Հայաստանի Հանրապետության ապագա զինվորականներն են։ Նրանք են կերտում մեր ապագան», — ասաց Տոնոյանը։
Մոնթե Մելքոնյանի անվան ռազմամարզական վարժարանի ղեկավար, գնդապետ Վիտալի Ոսկանյանի խոսքով` նրանից ոչ բոլորը կբռնեն ռազմական ուղին, շուրջ 10 տոկոսը կշարունակի ուսումը քաղաքացիական հաստատություններում, սակայն կրկին ՊՆ-ի պատվերի շրջանակում։
«Խնդիր դրված չէ, որ «Մոնթեի» շրջանավարտները պարտադիր շարունակեն ուսումը ռազմական ինստիտուտներում, սակայն, հաշվի առնելով, որ վարժարանը ռազմամարզական կրթահամալիր է` այստեղ պատրաստում են մարդկանց, որոնք պատրաստ են հերոսաբար պաշտպանել հայրենիքը», — ասաց Ոսկանյանը։
Նրա խոսքով` ապրիլյան պատերազմում վարժարանի շրջանավարտներից մեկը զոհվեց, ևս մի քանիսը վիրավորվեցին, բազմաթիվ սաներ պարգևատրվեցին մեդալներով։ «Մոնթե Մելքոնյան» վարժարանն իր գոյության ընթացքում ընդհանուր առմամբ շուրջ 1300 շրջանավարտ է ունեցել։
