Լաուրա Սարգսյան, Sputnik.
Երգիչը ստեղծագործական ուղին սկսել է փոքր տարիքից ու այսօր իր կյանքն առանց երաժշտության, ինչպես նաև առանց Հայաստանի այլևս չի պատկերացնում։ Նրա խնդրանքից հետո անցած տարի ՀՀ նախագահ Սերժ Սարգսյանի հրամանագրով երգչին Հայաստանի Հանրապետության քաղաքացիություն է շնորհվել։
«Արաքսը» երգելու գաղափարը Դանիելի մոտ հղացել է Հայաստանում շրջագայելու ժամանակ։ Երաժշտությունը լսել է Արա Գևորգյանի ավտոմեքենայում, որոշել է անգլերեն տեքստ գրել ու երգը ներկայացնել Հայաստանում նախատեսվող առաջիկա համերգի ժամանակ։
«Ես ինձ հայ եմ համարում և հպարտանում եմ դրանով։ Ամերիկայում ապրող ծնողներս ու ընկերներս սատարում են ինձ։ Գիտե՞ք` ազգային պատկանելությունը փիլիսոփայական հարց է։ Այն արտացոլում է հոգեվիճակդ», — լրագրողների հետ զրույցում ասաց Դանիելը։
Դանիելը սիրահարվել է Հայաստանին, երբ ծանոթացել է երկրի պատմությանը, մշակույթին, շփվել է մարդկանց հետ։ Առաջին անգամ Հայաստանում է եղել տասնհինգ տարի առաջ և, ինչպես խոստովանում է, «դեռ այն ժամանակ է մեծ հետաքրքրություն առաջացել երկրի նկատմամբ»։ Հաջորդ այցի ժամանակ հարգանքով է լցվել հայ ժողովրդի նկատմամբ, հետո արդեն անվերադարձ սիրել է։
Դանիելը բազմաթիվ անգամ է վերհանել Հայոց ցեղասպանության հարցը, ինչի համար էլ բազմաթիվ վիրավորանքներ է ստացել թուրքերից։
«Ես գերադասում եմ երգել Ցեղասպանության մասին, քանի որ երգն ավելի լավ է հիշվում, քան սովորական դասախոսությունը», — ասաց երգիչը։
Մի անգամ, երբ Դանիելը «Ադանան» է երգել, նրան մի թուրք է գրել։ Դանիելը որոշել է փաստերի լեզվով պատասխանել ու յուրաքանչյուր ագրեսիվ նամակին պատմությունից վերցրած մի փաստ է ուղարկել։
«Շուտով թուրքը սկսեց ավելի բարյացակամ խոսել, և ես հասկացա, թե ինչ փակ ու քարոզչական միջավայրում է նա մեծացել։ Մեղավոր չէր, որ չգիտեր այդ մանրամասները», — ասաց Դանիելը։
Նա նշեց, որ Հայոց ցեղասպանության հարցը վաղուց լուծված է, քանի որ «մենք` հայերս, գիտենք ճշմարտությունն ու գիտենք, որ Ցեղասպանություն եղել է»։ Դանիելը կարծում է, որ շուտով պատմությունն ամեն ինչ իր տեղը կդնի։
Դանիելն արդեն եղել է Ղարաբաղում և երազում է համերգ տալ նաև այնտեղ։ Չի բացառվում, որ մոտ ապագայում նա ընդհանրապես այլևս չհեռանա Հայաստանից։ Նա յուրօրինակ հուզմունքով է կատարում «Դլե Յամանը», «Կիլիկիան», «Մուշը» և հայկական մի շարք այլ երգեր։
