ԵՐԵՎԱՆ, 27 մայիսի — Sputnik. ԶՈՒ-ում բոլոր պաշտոնները համալրված են, և բանակի ղեկավարությունը խնդիրներն իրականացնում է պատշաճ մակարդակով, լրագրողներին ասաց Սեյրան Օհանյանը` մեկնաբանելով Լեռնային Ղարաբաղի Պաշտպանության բանակի նախկին նախարար և հիմնադիր Սամվել Բաբայանին ռազմական որևէ պաշտոնում նշանակելու հավանականությունը։
Բաբայանը 1992 թվականից համակարգում էր Ղարաբաղի պաշտպանական շրջանների ռազմական գործողությունները, մասնակցել է Շուշիի ազատագրման գործողությունների մշակմանը։ 1994 թվականի մայիսի 11-ին նա Ղարաբաղի անունից հրադադարի մասին համաձայնագիր է ստորագրել Ադրբեջանի հետ։
«Յուրաքանչյուր ոք, այսօր գտնվելով Հայաստանում, Արցախում, մեր լեռնաշխարհը համարելով իր հայրենիքը` կարող է իր ներդրումներն ունենալ այս կամ այն ծառայության մեջ: Զինվորական ծառայության առումով ես չեմ կարող ասել, որովհետև այսօր մեր բոլոր պաշտոնները, հաստիքները համալրված են, և բանակի անձնակազմը, բանակի գեներալական կազմը իրենց խնդիրները կատարում են պատշաճ մակարդակով», — ասաց Օհանյանը։
Բանակի անարդյունավետ սպառազինման վերաբերյալ Բաբայանի հայտարարության մասին խոսելիս` Օհանյանը նշեց, որ ուշադրություն չի դարձնում առանձին հայտարարությունների վրա։
«Այս տարիների ընթացքում մենք լուրջ աշխատանք ենք կատարել բանակի հնարավորությունների ընդլայնման և կատարելագործման ուղղությամբ։ Իհարկե, նաև բացթողումներ ունենք, սակայն դրանք չեն լինում այնտեղ, որտեղ աշխատանքներ չեն տարվում։ Մենք աշխատում էինք, աշխատում ենք և շարունակում ենք զարգացնել բանակը սպառազինությամբ և տեխնիկայով համալրելու ծրագրերը»։
Բաբայանը 2000 թվականին Լեռնային Ղարաբաղի Հանրապետության նախկին նախագահ Արկադի Ղուկասյանի վրա մահափորձ կազմակերպելու մեղադրանքով դատապարտվել էր 14 տարվա ազատազրկման։ Շուշիի բանտում 4.5 տարի անցկացնելուց հետո 2004 թվականին նրան ներում էր շնորհվել, և Բաբայանն ազատ էր արձակվել։ Նա տեղափոխվել էր Երևան և քաղաքականությամբ էր զբաղվում։
2005 թվականին հիմնեց «Դաշինք» կուսակցությունը, սակայն այդպես էլ լուրջ հաջողությունների չհասավ։ 2010 թվականին Բաբայանը հեռացավ Հայաստանից։
