ԵՐԵՎԱՆ, 27 մայիսի — Sputnik. Հայաստանի կրթության և գիտության նախարար Լևոն Մկրտչյանը շնորհավորական ուղերձ է հղել աշակերտներին և ուսուցիչներին Վերջին դասի կապակցությամբ, հայտնում է նախարարության կայքը։
Շնորհավորելով աշակերտներին` նախարարը նշել է, որ օրվա գլխավոր խորհուրդը ոչ միայն դպրոցական տարիների ավարտն է, այլև կյանքի առավել պատասխանատու փուլի մեկնարկը:
«Դուք թևակոխում եք մասնագիտության ընտրության և կյանքի ապագա ճանապարհն ուրվագծելու կարևոր ժամանակահատված, որը պահանջում է լինել առավել հավասարակշռված և հաստատակամ, նպատակասլաց ու բանիմաց»,- նշված է նախարարի ուղերձում:
Մկրտչյանը նշել է, որ աշակերտները հրաժեշտ են տալիս հարազատ դարձած կրթօջախին, որտեղ տարիներ շարունակ կրթվել են, ստացել գիտելիքներ շրջապատող աշխարհի մասին, ճանաչել բարին ու լուսավորը: Այստեղ են ձևավորվել նրանց ընկերական այն հարաբերությունները, որոնց անաղարտությունն ուղեկցելու է նրանց ողջ կյանքի ընթացքում:
Նա դիմել է ուսուցիչներին` նշելով, որ նրանք տարիներ շարունակ կրթած ու դաստիարակած հերթական սերունդ են ճանապարհում կյանք` նրանց պատգամելով հավատարիմ մնալ ազգային արժեքներին և գաղափարներին:
Նրա խոսքով` Հայրենիքի և ազգային իղձերի նկատմամբ սերն ու վերաբերմունքը, որոնք ծնողական հոգատարությամբ ու համբերությամբ ուսուցիչները սերմանում են տարիների ընթացքում, իրենց պտուղներ են տալիս ապագայում:
«Առհավատչյան այս օրերին սահմանը պահող զինվորն է՝ հայի անկոտրում ոգով, անսահման հայրենասիրությամբ ու սեփական հողը պաշտպանող հերոսի գիտակցությամբ: Համոզված եմ, որ մեր այսօրվա շրջանավարտները ևս հպարտանալու բազում պահեր են պարգևելու իրենց ուսուցիչներին ու ծնողներին և դառնալու են մեր անկախ պետության հիմքերն ամրապնդող, կիրթ ու բանիմաց, օրինակելի քաղաքացիներ»,- նշել է Մկրտչյանը:
Նախարարը ուսումնառության Վերջին դասի կապակցությամբ շնորհավորել է Հայաստանում, Սփյուռքում, Արցախում և Ջավախքում ապրող բոլոր շրջանավարտներին, ուսուցիչներին ու ծնողներին: Այս հիշարժան ու գեղեցիկ օրը, մաղթում է նրանց տոնական բարձր տրամադրություն, բարօրություն, հաջողություններ ու նորանոր ձեռքբերումներ:
Նշենք, որ այսօր վերջին զանգը կհնչի հանրապետության 1400 դպրոցներում, Վերջին դասին կմասնակցի շուրջ 25 հազար շրջանավարտ: Վերջին զանգի միջոցառումներն այս տարի կմեկնարկեն 1 րոպե լռությամբ՝ հարգելով ապրիլյան քառօրյա պատերազմի զոհերի հիշատակը:
