Լաուրա Սարգսյան, Sputnik.
Արգենտինացի դիրիժոր և բանդոնեոնահար Կառլոս Բուոնոյի ասուլիսը սկսվեց տասնմեկ րոպե ուշացումով։ Երևանի պետական ֆիլհարմոնիայի ճեմասրահում հավաքվածները սպասում էին դեսպան Գոնսալո Ուրիոլաբետիային։ Այս ժամանակահատվածում Բուոնոն հայացք գցեց լրագրողների ուղղությամբ, ժպտաց ու զարմացած բացականչեց` միայն կանայք են հավաքվել։
Մաեստրո Բուոնոյին հավանաբար չէին հասցրել զգուշացնել, որ Հայաստանում տղամարդ լրագրողներ քիչ կան, և նրանք հիմնականում կա՛մ տնտեսական, կա՛մ քաղաքական ոլորտներն են լուսաբանում։
Տասնմեկ րոպե անց ժամանեց դեսպանը, ժպտալով ներողություն խնդրեց ուշանալու համար, և մամուլի ասուլիսը սկսվեց։ Դեռ չգիտեինք, որ էլի ուշացող կա. գրեթե մեկուկես ժամ բանախոսների հետ շփվելուց հետո ասուլիսին միացավ նաև հայտնի շախմատիստ Լևոն Արոնյանի կինը` Արիանա Կաոիլը։
Մի փոքր Բուոնոյի մասին
Բուոնոն ծնվել է Արգենտինայում, մայրն իսպանուհի է, հայրն` իտալացի, կինը` շվեյցարացի, որդին ամուսնացել է գերմանուհու հետ, դուստրը` իռլանդացու։ Նա իր ընտանեկան «խառնուրդն» իսկական տանգո է կոչում։
«Սա Արգենտինան է, և սա է տանգոն»,- լրագրողներին ասաց Բուոնոն։
Երաժիշտն ավելացրեց, որ իր ընտանիքում չեն պարում, և ոչ ոք պարի հանդեպ կոնկրետ հակումներ չունի։
«Գուցե այն պատճառով, որ իմ առավոտը սկսում է տանգոյի երաժշտությամբ, օրվա երկրորդ կեսին տանգո եմ լսում, երեկոյան տանգո եմ նվագում», — ասաց Բուոնոն։
Հայտնի արգենտինացին շնորհակալություն է հայտնում ծնողներին օգնության և աջակցման համար։ Նա ցավով է նշում, որ անընդմեջ շրջագայությունները խանգարել են ու չի հասցրել հրաժեշտ տալ նրանց կյանքի վերջին օրերին։
«Ես մեծ գին եմ վճարել այն ամենի համար, ինչ ունեմ։ Անցյալ տարի 98 համերգ եմ տվել աշխարհի 27 երկրում, իսկ երևանյան համերգն այս տարվա 90-րդ համերգս է լինելու։ Սակայն երաժշտությունն ինձ համար սիրահարվածության զգացմունքի պես մի բան է», — պատմում է մաեստրոն։
Նա պատմեց, որ գործիքին սիրահարվել է օծանելիքի հոտի շնորհիվ, երբ դեռ 6 տարեկան է եղել։
…Հոր հետ հաճախ էր նստում տան մոտ գտնվող նստարանին։ Մի մարդ կար, որը պարբերաբար բարևում էր հորը, և նրանից միշտ նույն հոտն էր գալիս։ Ու դա ճակատագրական դարձավ փոքրիկ արգենտինացու համար։
«Մի երեկո հայրիկիս հետ միջոցառման գնացինք, բեմում տեսա այդ մարդուն, ձեռքին` բանդոնեոն», — պատմեց մաեստրոն։
Ու այդ օրը որոշիչ դարձավ. կանխորոշվեց բանդոնեոնահարի ճակատագիրը։ Sputnik Արմենիայի թղթակցի հետ զրույցում խոստովանեց, որ կարող էր նաև իրավաբան դառնալ։ Հետո ասաց, որ իրեն միշտ մի բան է զարմացրել` այն, որ երկինքն ու աստղերն ամեն տեղ նույնն են։
Համերգային ծրագիրը
Ուրբաթ երեկոն խոստանում է թեժ լինել, քանի որ բացի երաժշտությունից, բեմ են բարձրանալու նաև տանգո պարողները`Սուրեն Մխիթարյանը, Արկադի Ատասունցևը, Դիանա Հայրապետյանն ու Ադրիանա Կաոիլը։
Կաոիլը հայտնի գրոսմայստեր Լևոն Արոնյանի կինն է։ Խոստովանում է` շախմատ խաղալուց բացի, նաև պարել է սիրում։
Sputnik Արմենիայի թղթակցի հարցին, թե որտեղ և երբ է ծանոթացել իր ամուսնու` հայտնի հայ գրոսմայստեր Լևոն Արոնյանի հետ, Կաոիլը պատասխանեց, «Իսպանիայում, շախմատի առաջնության ժամանակ, երբ ես 9 տարեկան էր, իսկ Արոնյանը` մի փոքր մեծ»։
Հայ-արգենտինական բարեկամության երեկոյի ընթացքում կհնչեն Աստոր Պիացոլայի, Յակով Գադեի, Մարիանո Մորեսի, Էդուարդո Արոլասի և այլ կոմպոզիտորների ստեղծագործությունները։
