ԵՐԵՎԱՆ, 25 մայիսի — Sputnik. Հայաստանի Հանրապետության կառավարությանն առընթեր միջուկային անվտանգության կարգավորման պետական կոմիտեի` Հայաստանի կողմից «Միջուկային զենքը չտարածելու մասին» պայմանագրի պահանջների կատարման վերաբերյալ պարզաբանման մեջ նշված է, որ ՀՀ-ում մշտապես իրականացվում է հաշվառում և վերահսկողություն առկա միջուկային նյութերի նկատմամբ, որոնք կարող են կիրառվել միջուկային զենք ստեղծելու համար:
Միջուկային զենքի չտարածման պայմանագրի և Ատոմային էներգիայի միջազգային գործակալության (ԱԷՄԳ) երաշխիքների կիրառման համաձայնագրի հետ կապված վերահսկողությունն իրականացվում է երեք մակարդակով.
Տեղակայանքի մակարդակ — միջուկային նյութերի հաշվառումը և հսկողությունը իրականացնում է տվյալ տեղակայանքի անձնակազմը:
Պետական մակարդակ — հաշվառումն ու վերահսկողությունը իրականացնում է օրենքով ճանաչված պետական մարմինը՝ ՀՀ կառավարությանն առընթեր միջուկային անվտանգության կարգավորման պետական կոմիտեն:
Միջազգային մակարդակ — հաշվառումն ու վերահսկողությունը իրականացնում է ԱԷՄԳ-ն տեսչական անձնակազմը:
ԱԷՄԳ-ի տեսուչները պարբերաբար անցկացնում են տեսչական ստուգումներ, իր հերթին ՀՀ-ն ԱԷՄԳ-ին է ներկայացնում համապատասխան հաշվետվություններ և հայտարարագրեր:
Սահմանված կարգի համաձայն` ԱԷՄԳ-ի կողմից տեղադրված են անընդհատ հսկողության տեսասարքեր՝ հետևելու միջուկային նյութի տեղաշարժին:
Միջուկային նյութեր պարունակող օբյեկտները, պահոցները, հանգույցները կնքված են հատուկ կնիքներով, որոնց ցանկացած վնասումը արբանյակային կապի միջոցով անմիջապես կարձանագրվի ԱԷՄԳ-ի հատուկ ստորաբաժանման կողմից:
ԱԷՄԳ-ի տեսուչները մինչ այժմ ՀՀ-ում անցկացրել են մոտ 200 տեսչական ստուգում, որոնց արդյունքում միջազգային պայմանագրերի պահանջների որևէ շեղում, խախտում չի արձանագրվել:
ՀՀ-ն մասնակցել է ԱՄՆ նախագահի նախաձեռնությամբ կայացած միջուկային անվտանգության չորս գագաթնաժողովի և այդ համատեքստում իրականացրել բազմաթիվ միջոցառումներ, որոնք նպատակամղված են միջուկային տեղակայանքների, միջուկային և ռադիոակտիվ նյութերի անվտանգ պահպանմանը, դրանց ֆիզիկական պաշտպանության աստիճանի բարձրացմանը, ինչպես նաև միջուկային և ռադիոակտիվ նյութերի մաքսանենգության դեմ պայքարին:
Հայաստանի Հանրապետության կառավարությանն առընթեր միջուկային անվտանգության կարգավորման պետական կոմիտեն վստահեցնում է, որ ՀՀ-ն պատշաճ կերպով կատարում է միջազգային պայմանագրերով ստանձնած բոլոր պարտավորությունները:
