ԵՐԵՎԱՆ, 25 մայիսի- Sputnik. Գերմանիայի ավարտված առաջնության լավագույն ֆուտբոլիստ ճանաչված Հենրիխ Մխիթարյանը Ֆեյսբուքի իր էջում շնորհակալություն է հայտնել իր օգտին քվեարկածներին:
«Իսկապես, մեծ պատիվ է ընտրվել մրցաշրջանի լավագույն ֆուտբոլիստ: Շնորհակալություն բոլոր քվեարկողներին այս զարմանալի ընտրության համար»,- գրել է Դորտմունդի «Բորուսիայի» կիսապաշտպանը:
Մխիթարյանը լավագույն խաղացող է ճանաչվել Բունդեսլիգայի ֆուտբոլիստների շրջանում անցկացված հարցման արդյունքում։
Նշենք, որ գերմանական Kicker-ը հարցում էր անցկացրել Բունդեսլիգայի ֆուտբոլիստների շրջանում՝ որոշելու մրցաշրջանի լավագույն ֆուտբոլիստին: Հայաստանի հավաքականի ավագը հավաքել էր ձայների 31.1 տոկոսը՝ գերազանցելով Մյունխենի «Բավարիայի» ֆուտբոլիստներ Ռոբերտ Լևանդովսկուն (22.1) ու Թոմաս Մյուլերին (13.6), ինչպես նաև իր ակումբակից Պիեռ-Էմերիկ Օբամեյանգին (13.2):
