ԵՐԵՎԱՆ, 24 մայիսի — Sputnik. Ղարաբաղյան հակամարտության կարգավորման բանակցությունները կարող են սկսվել Վիեննայում Հայաստանի և Ադրբեջանի ձեռք բերված պայմանավորվածությունների կատարումից հետո, ասել է ԱԺ փոխխոսնակ Էդուարդ Շարմազանովը իր գերմանացի գործընկեր Էդելգարդ Բուլմահնի հետ հանդիպումից հետո։
«Բանակցությունների վերսկսման համար հարկավոր է կատարել այն պայմանավորվածությունները, որոնք Վիեննայի հանդիպումից հետո իրենց հայտարարությունների մեջ նշել են ԵԱՀԿ ՄԽ համանախագահների ԱԳՆ ղեկավարները», — ասաց Շարմազանովը։
Նա ընդգծել է, որ հայկական կողմը մեծ կարևորություն է տալիս միջադեպի հետաքննության մեխանիզմների ներդրմանը։
«Դա թույլ կտա հստակ տարբերակել, թե ով է խախտում հրադադարի ռեժիմը և ով է տարածաշրջանում իրավիճակի ապակայունացման մեղավորը», — ասել է Շարմազանովը։
Նա նշել է, որ գերմանական կողմը նույնպես ընդունում է համանախագահների այս առաջարկը։ Նրա խոսքով` Գերմանիան իր հերթին, որպես ԵԱՀԿ-ում նախագահող երկիր, շատ ակտիվ է և նախաձեռնող տարածաշրջանային անվտանգության ապահովման հարցում։
Շարմազանովը հայտնել է, որ նա Բուլմահնին ներկայացրել է Ադրբեջանի կողմից սանձազերծված պատերազմի մանրամասները` նշելով, որ այն ուղեկցվել է ռազմական մի շարք հանցագործություններով. խոշտանգվել են ոչ միայն զինվորականներ, այլև` խաղաղ բնակիչներ:
Նա նշել է, որ Ղարաբաղի հարցը պետք է լուծվի խաղաղ ճանապարհով ԵԱՀԿ ՄԽ շրջանակում, սակայն ընդգծել է, որ Ղարաբաղի ինքնորոշումն այլընտրանք չունի։
