ԵՐԵՎԱՆ, 23 մայիսի- Sputnik. Հայկական կողմն աշխատում է Հայաստանի և Ռուսաստանի միջև ստորագրված զենք ձեռք բերելու վերաբերյալ վարկային համաձայնագրի շրջանակում փաստաթղթային աշխատանքներն ավարտելու ուղղությամբ։ Այս մասին հայտարարեց ՀՀ պաշտպանության նախարար Սեյրան Օհանյանը։
Նրա խոսքով` աշխատանք է տարվում, պայմանագրերի մի մասն արդեն ստորագրված է, խմբերն աշխատում են, համապատասխան փոխգործակցությունը հաստատված է։
«Աշխատանքներ տանում ենք, պայմանագրերի որոշ մասն արդեն կնքված է, խմբերն աշխատում են, համապատասխան գործակցություն ձևավորված է, աշխատում ենք արագացված տեմպերով: Այդ միջոցների որոշ մասը պատրաստ վիճակում են, կփորձենք արագ տեղափոխել Հայաստան»,- ասաց Օհանյանը։ Ժամկետների մասին հարցին Օհանյանը պատասխանեց` թույլ տվեք զբաղվել այդ գործով։
Հայաստանի կառավարությունն ապրիլի 15-ին հաստատել է ՌԴ կառավարության հետ համաձայնագրի դրույթների իրագործման մասին որոշման նախագիծը` ռազմական նշանակության արտադրանքի առաքումները ֆինանսավորելու նպատակով Երևանին 200 մլն դոլարի պետական արտահանման վարկ տրամադրելու վերաբերյալ ։
Համապատասխան համաձայնագիրը ստորագրվել է Երևանում 2015թ.-ի հունիսի 26-ին, սակայն երկար ժամանակ մնացել է թղթի վրա։
