ԵՐԵՎԱՆ, 23 մայիսի — Sputnik. Ապրիլյան պատերազմի ժամանակ որոշակի տարածքների կորուստը չի ազդում Լեռնային Ղարաբաղի մրցունակության վրա, Ազգային ժողովում լրագրողներին ասաց Հայաստանի պաշտպանության նախարար Սեյրան Օհանյանը։
Ավելի վաղ Հայաստանի նախագահը խոստովանել է, որ հայկական կողմը կորցրել է 800հա տարածք, որը ռազմավարական նշանակություն չունի։
«Ամեն մեկը պետք է իր խնդիրներով ու պարտականություններով զբաղվի։ Կարծում եմ` հասկանալի է, որ ԼՂՀ ղեկավարությունը և ռազմաքաղաքական ղեկավարությունը քննարկում են այդ խնդիրները»,- ասաց Օհանյանը` մեկնաբանելով կորցրած տարածքների արժեքը։
Նրա խոսքով` այդ տարածքներում դիրքերն այնպես են դասավորված, որ վերահսկողությունը, նախաձեռնությունը, իսկ անհրաժեշտության դեպքում խոցելու բոլոր նախաձեռնությունները գտնվում են ԼՂՀ ՊԲ ստորաբաժանումների ձեռքում։
«Հարձակողական և պաշտպանական գործողությունների ընթացքում մարտական խնդիրները կատարելիս լինում է դիրքերի փոփոխություն։ Դա չպետք է վախեցնի մեզ մեր առջև դրված խնդիրների լիարժեք կատարման հարցում»,- ասաց Օհանյանը։ Նրա կարծիքով` Ղարաբաղի բանակը կատարել է իր բոլոր խնդիրները։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
