ԵՐԵՎԱՆ, 23 մայիսի — Sputnik. Ռեջեփ Թայիփ Էրդողանի հայտարարությունը Sputnik ռադիոկայանի զրուցակցի` Լևոն Հովսեփյանի մոտ տարակուսանք է առաջացնում, քանի որ Թուրքիան անուղղակի մասնակցություն ունի մի շարք երկրներում առաջացած ճգնաժամերի ու հակամարտությունների հարցում։ Թուրքագետի խոսքով` հակամարտությունների այս կամ այն կերպ ներգրավվածության փորձառությունը ցույց է տալիս, որ Թուրքիան, որպես միջնորդ, որևէ հակամարտության կարգավորման հարցում դրական լուծում չի ապահովում։ Ավելին`Թուրքիան իր գործողություններով ու քաղաքականությամբ նպաստում է ոչ թե դրանց կարգավորմանը, այլ` ավելի խորացմանը, սրմանը։
«Դա կարող ենք դիտարկել Սիրիայի, Իրաքի պարագայում, Արցախի հակամարտության համատեքստում։ Շաբլոնային հայտարարություն է, չեմ կարծում, որ Թուրքիան հետագայում կարող է կարգավորիչ դերակատարություն ունենալ»,-ասաց նա։
Նա անդրադարձավ նաև Էրդողանի վարած քաղաքականությանը Եվրոպայի հետ` որակելով այն «շանտաժային»։
«Այն, ինչ Թուրքիան իրականացնում է Եվրամիության հետ հարաբերություններում, շանտաժային, սպառնալիքներով լի քաղաքականություն է, պայմանավորված է Եվրամիության հետ ունեցած խնդիրներով։ Թուրքիան փորձում է սպառնալիքներ օգտագործելով լծակներ ստանալ ու կոշտացնել քաղաքականությունը»,-ասաց թուրքագետը։
Չնայած այս դիտարկումներին, Լևոն Հովսեփյանի խոսքով` Եվրոպայում տրամադրություններ են փոխվում. եվրոպական որոշ երկրներ արդեն իսկ հաստատակամորեն վերապահումներ ունեն Թուրքիայի` Եվրամիությանն անդամակցելու վերաբերյալ։
