ԵՐԵՎԱՆ, 23 մայիսի — Sputnik. 2015 թվականի վերջին Հայաստանի պետական պարտքը կազմել է 5 մլրդ 79 մլն դոլար (2 տրիլիոն 457 մլն դրամ), Ազգային ժողովի պաշտպանության, ազգային անվտանգության և ներքին գործերի ու ֆինանսավարկային եւ բյուջետային հարցերի մշտական հանձնաժողովների համատեղ նիստ պետական բյուջեի կատարման մասին հաշվետվությունը ներկայացնելու ժամանակ հայտնել է ֆինանսների փոխնախարար, Հայաստանի գլխավոր գանձապահ Ատոմ Ջանջուղազյանը:
«4 մլրդ 602 մլն դոլարը կառավարության պարտավորություններն են: Արտաքին պարտքի մասնաբաժինը կազմում է 4 մլրդ 317 մլն դոլար, իսկ ներքինը` 761 մլն դոլար», — ասաց Ջանջուղազյանը:
Նա ավելացրեց, որ Հայաստանը շարունակում է մնալ միջին պարտքի բեռ ունեցող երկրների շարքում:
«Նման երկրներ են համարվում այն պետությունները, որոնց պետական պարտքերը չեն հասել ՀՆԱ-ի 48%-ին, Հայաստանում այդ ցուցանիշը կազմում է 34%», — ասաց Ջանջուղազյանը:
Նրա խոսքով` սա չի նշանակում, որ կառավարությունը չի գնահատում պետական պարտքի հետ կապված ռիսկերը:
Ջանջուղազյանը նաև պետբյուջեի եկամուտներին վերաբերող թվեր ներկայացրեց: Նա հայտնեց, որ 2015 թվականին պետբյուջեի եկամուտների 91,4%-ն ապահովվել է պետական տուրքերի և հարկերի հաշվին, որոնք կազմել էին 67.9 մլրդ դրամ:
«Նշված գումարից 1 տրիլիոն 35.5 մլրդ դրամը կազմել էին հարկերը, 32.4 միլիարդը` պետական տուրքերը», — ասաց Ջանջուղազյանը:
Նա նշեց, որ 2014 թվականի համեմատ հարկերն ու պետտուրքերն աճել են 0,4%-ով (3,8 մլրդ դրամով): Ընդ որում` հարկերն աճել են 1%-ով (ավելի քան 10,6 մլրդ դրամ), իսկ պետտուրքերը նվազել են 17,5%-ով (9,6 մլրդ դրամ):
