ԵՐԵՎԱՆ, 22 մայիսի — Sputnik. Միայն հայ ազգին, հայի տեսակին ծանոթանալու համար զբոսաշրջիկները պետք է այցելեն Հայաստան, կարծում է զբոսաշրջության մասնագետ Սարգիս Ղազարյանը` միաժամանակ հավելելով, որ միայն մարդկային ռեսուրսն, իհարկե, բավարար չէ երկիրը զբոսաշրջիկի համար գրավիչ դարձնելու համար:
«Մենք ունենք 4 հարևան, որոնցից մեկի հետ կա միայն օդային կապ, մյուսի հետ բացարձակ որևէ կապ չկա, երրորդ` հյուսիսային հարևանի հետ կան փայլուն հաղորդակցման հնարավորություններ` երկաթգծային, որը, ցավոք, շատ թույլ է աշխատում, ավտոճանապարհային, և հարավում ունենք մի հարևան` ԻԻՀ-ն, որի հետ հարաբերություններն ամրանում, ընդլայնվում են, և այս ամենը պետք է օգտագործել»,- նշեց ռադիոկայանի զրուցակիցը։
Նա հավելեց, որ զուգահեռաբար չունենք անհրաժեշտ ենթակառուցվածքներ` հարևանների հետ հարաբերությունները ցանկալի մակարդակով զարգացնելու համար:
Բացի գիշերելու հնարավորությունից, սակայն, մասնագետը կարևում է նաև զբոսաշրջիկներին մատուցվող այլ ծառայությունների որակը, մասնավորապես` սննդի և ժամանցի կազմակերպումը, ինչպես նաև երկրի տեսարժան վայրերի, պատմամշակութային վայրերի ու բնության ներկայացումը: Սարգիս Ղազարյանի խոսքով` այսօր Հայաստանում կա 1836 սննդի կազմակերպման օբյեկտ, որից 1092-ը` Երևանում:
«Մենք բավականին լուրջ խոհանոցային ավանդույթ ունեցող ազգ ենք, և պետք է կարողանանք նաև ճիշտ ներկայացնել»,- ասաց ռադիոկայանի զրուցակիցը:
Ինչ վերաբերում է պատմամշակութային ու բնության արժեքներին, փորձագետը կարևորում է նաև դրանց ճիշտ ներկայացումը զբոսաշրջիկներին, գիտուն զբոսավարների առկայությունը:
Զբոսաշրջիկներին մատուցվող ծառայություններից Սարգիս Ղազարյանը հիշատակեց օդանավակայանում հանդիպող մի բացասական երևույթ.
«Աշխարհում ոչ մի երկիր չեք գտնի, որտեղ սայլակները փողով են` 1400 կամ 1600 դրամ, ամոթ է։ Այդ մարդը նոր է վայրէջք կատարել, որտեղի՞ց նրան այդ 1400 դրամը, իսկ տարադրամի փոխանակման կետի փոխարժեքն օդանավակայանում ուղղակի սպանիչ է: Եվ այսքանն արդեն բավական է մեր երկիր առաջին անգամ ոտք դրած զբոսաշրջիկի վրա վատ ազդեցություն թողնելու համար»:
«Մարդիկ գալիս են, տեսնում մեր ազգի խաղաղասեր կերպարը, մեր հոգեկերտվածքը և համոզվում է, որ սա անվտանգ երկիր է, որտեղ հանգիստ կարելի է մինչև գիշերվա ժամը 3-4-ն անվտանգ շրջել»,- ասաց Սարգիս Ղազարյանը:
