ԵՐԵՎԱՆ, 22 մայիսի — Sputnik. Բռնցքամարտիկ Վանես Մարտիրոսյանը ռևանշ մենամարտում պարտվեց պրոֆեսիոնալ բռնցքամարտի առաջին միջին քաշային կարգում IBO և WBA վարկածներով աշխարհի չեմպիոն Էրիսլանդի Լարային, սակայն հայ բռնցքամարտիկը համաձայն չէ մրցավարների որոշման հետ։
Լաս Վեգասում տեղի ունեցած մենամարտում 33-ամյա կուբացին առավելության հասավ մրցավարների միաձայն որոշմամբ:
«Ես առաջնորդ էի ամբողջ մենամարտի ընթացքում։ Ես ճնշում էի գործադրում և շատ բան արեցի հաղթանակի համար։ Ինձ տուգանեցին գոտկատեղից ներքև հարվածի համար։ Բայց նայեք կրկնությունները, մրցակցի վարտիքը չափազանց վեր էր բարձրացված։ Ես երբեք չեմ խուսափել մենամարտերից։ Ոչ ոք չէր ուզում մենամարտել Լարայի հետ։ Ես դա արեցի։ Ես պատրաստ եմ մենամարտի ցանկացած մրցակցի հետ»,- ասել է Մարտիրոսյանը։
Ավելի ուշ Instagram-ում և Twitter-ում նա հրապարակել է մրցավարների որոշումները և գրել. «Չեմ կարող հավատալ։ Ես հաղթել եմ մենամարտում։ Ինչ զզվելի մրցավարություն»։
Wow I can't Believe this Scoring! I Won this Fight! Look at this Shity Judging pic.twitter.com/HwW2kW8jka
— Vanes Martirosyan (@VanesBoxing) 22 мая 2016 г.
Բռնցքամարտիկների առաջին մենամարտը տեղի էր ունեցել 2012 թվականին: Այն ժամանակ ոչ դիտավորյալ բախման հետևանքով Վանես Մարտիրոսյանն աչքի արնահոսող վնասվածք էր ստացել և 9-րդ ռաունդում մենամարտը դադարեցվել էր, սակայն գրանցվել էր տեխնիկական ոչ-ոքի. երեք մրցավարներից մեկը հաղթանակը շնորհել էր Մարտիրոսյանին, մյուսը՝ Լարային, իսկ երրորդ մրցավարը գրանցել էր ոչ-ոքի:
