ԵՐԵՎԱՆ, 22 մայիսի-Sputnik. Լեռնային Ղարաբաղում ապրիլյան քառօրյա պատերազմից հետո ադրբեջանցիները Ստոկհոլմում հակահայկական ցույցեր կազմակերպեցին: Դրանցից մեկի ժամանակ թուրք ազգայնամոլ, Շվեդիայի թուրքական միությունները համակարգող խորհրդի փոխնախագահ Բարբարոս Լեյլանին կոչ արեց` սպանել հայերին: Այդ արարքը ժողովրդավարական երկրում անարձագանք չմնաց. այդ դրվագը նկարահանվեց ու տեղադրվեց համացանցում: Դրանից հետո ոչ միայն նրան պաշտոնանկ արեցին, այլև Շվեդիայի` ազգությամբ թուրք քաղաքաշինության նախարարին:
«Չեմ կարող չնշել հայ համայնքի դերն այդ օրերին: Մենք ուշադրությամբ հետևում էինք այդ դեպքերին, և այժմ համայնքի կողմից բավական բողոքներ կան ոստիկանություն, որի արդյունքում քրեական գործ է հարուցվել Բարբարոս Լեյլանիի դեմ` ազգայնամոլ արտահայտության համար»,- պատմեց Շվեդիայում բնակվող դուդուկահար Հայկ Հակոբյանը:
Այդ իրադարձություններից հետո երգչուհի Անի Ռուստամյանը և դաշնակահարուհի Անի Թովմասյանը դիմեցին դուդուկահարին՝ Ստոկհոլմում համերգ կազմակերպելու առաջարկով: Սկզբում նպատակ կար ներկայացնել դասական երաժշտություն, բայց չէին էլ կարող անտեսել Արցախում տիրող լարված իրավիճակը, ուստի ավելացրեցին նաև հայրենասիրական երգեր: Համերգը բարեգործական էր` նպատակ ուներ օգնության ձեռք մեկնել ապրիլյան պատերազմի ժամանակ զոհված հերոսների ընտանիքներին:
«Շատ հաճելի էր հանդիսատեսի ջերմ ընդունելությունը, հատկապես, որ բացի հայերից` համերգին ներկա էին նաև օտարազգիներ, այդ թվում՝ շվեդ երաժիշտներ, ովքեր արդեն ծանոթ էին հայկական երաժշտությանը, հատկապես հայկական դուդուկին»,-ասաց Հայկ Հակոբյանը:
Նրանց հետ առաջին համագործակցությունը դուդուկահարը դրական է գնահատում, քանի որ լսել է նաև հանդիսատեսի արձագանքը: Համերգին ներկա է եղել նաև Շվեդիայում Հայաստանի արտակարգ և լիազոր դեսպան Արտակ Ապիտոնյանը և տեղի Հայ Առաքելական եկեղեցու խորհուրդը: Զրուցակցի խոսքով՝ որոշվել է շարունակել այս ծրագիրը` Շվեդիայի հայ համայնքին բարձրորակ երաժշտություն մատուցելու համար:
