ԵՐԵՎԱՆ, 21 մայիսի — Sputnik. Երկու շաբաթից կառավարությունը ճանապարհային քարտեզ է ներկայացնելու՝ կոռուպցիայի, մենաշնորհների դեմ պայքարի, պետական ծախսերը կրճատելու վերաբերյալ, հայտարարեց վարչապետ Հովիկ Աբրահամյանը:
«Մենք շատ հստակ ճանապարհային քարտեզ ենք պատրաստում: Այսօր հանդիպել ենք հասարակական կազմակերպությունների և քաղաքացիական հասարակության ներկայացուցիչների հետ: Քննարկել ենք նրանց առաջարկները, խնդիրները: Հանդիպել ենք նաև խորհրդարանական բոլոր խմբակցությունների հետ, լսել նրանց», — լրագրողներին է ասել ՀՀ վարչապետ Հովիկ Աբրահամյանը:
Նրա խոսքով՝ երեքշաբթի՝ մայիսի 24-ին, կամփոփվեն բոլորի առաջարկներն ու կարծիքները:
«Կհամադրենք մեր պատկերացումներն իրենց պատկերացումների հետ, որի արդյունքում երկու շաբաթից կունենանք ճանապարհային քարտեզ», — ասել է Աբրահամյանը:
Նա նշել է, որ Հայաստանում կոռուպցիայի մակարդակը բարձր է, և այդ մակարդակը պետք է հասցվի նվազագույնի:
«Մենք պետք է վերականգնենք ժողովրդի վստահությունը», — ասել է ՀՀ վարչապետը:
Հովիկ Աբրահամյանը նշել է, որ հակամենաշնորհային հանձնաժողովը պետք է հետամուտ լինի և գործիքներ կիրառի լիազորությունները գերազանցող տնտեսվարողի նկատմամբ: Նրա խոսքով՝ բոլոր մեխանիզմները կան, միայն պետք է հետամուտ լինել այդ ամենն իրականացնելու համար:
