ԵՐԵՎԱՆ, 21 մայիսի — Sputnik. «Մենք միշտ առիթը օգտագործում ենք», — լրագրողներին է ասել Հովիկ Աբրահամյանը՝ պատասխանելով այն հարցին, թե ռուսական զենքի մատակարարման հարցն արդյոք քննարկվել է ՌԴ վարչապետ Դմիտրի Մեդվեդևի հետ:
«Մեր պայմանավորվածությունը գնում է առաջ՝ ըստ ծրագրի: Որևէ խնդիր չկա, ըստ պլանի գնում ենք: Այդ վարկը տրամադրվում է, և գործընթացը սկսված է», — ասել է վարչապետը:
Ավելի վաղ ՀՀ պաշտպանության նախարարի մամուլի խոսնակ Արծրուն Հովհաննիսյանը հայտարարել էր, որ Ռուսաստանի խոստացած 200 մլն դոլարի զենքը մեկ օրում չի հասնի Հայաստան:
Արծրուն Հովաննիսյանը նշել էր, որ Հայաստանը, բացի 200 մլն դոլար վարկով ձեռք բերվող զենքից, այլ միջոցներով էլ է զենք-զինամթերք գնում:
«Ուղղակի այդքան մասը վարկով է: Շատ ու շատ զենք-զինամթերք այս տասնյակ տարիների ընթացքում ձեռք են բերվել ոչ վարկով կամ այլ միջոցներով, ամեն ինչ չէ, որ պետք է հրապարակենք: Զենքի գնման գործընթացը մշտական է: Գրեթե տարի չի եղել, որ մի քանի անգամ տարբեր զենք- զինամթերք, ռազմական նշանակության կառավարման և այլ համակարգեր չներկրենք»,- ասել էր նա:
