ԵՐԵՎԱՆ, 20 մայիսի- Sputnik. ԵՏՄ երկրների ղեկավարները կհանդիպեն մայիսի 31-ին Աստանայում, հայտարարեց Ղազախստանի վարչապետ Քարիմ Մասիմովը։
«Ես կարծում եմ, որ այսօր քննարկվել են շատ կարևոր հարցեր պետությունների ղեկավարների հանդիպման նախաշեմին, որը տեղի կունենա մայիսի 31-ին Աստանայում»,- ասաց Մասիմովը։ Ղազախստանի վարչապետը նշեց, որ ԵՏՄ միջկառավարական խորհրդի հերթական նիստը, որն անցկացվեց Երևանում, կառուցողական է եղել։
«Առաջին հերթին, կառավարությունների ղեկավարների մակարդակում համաձայնեցվեց նավթամթերքների կարգավորմանն ուղղված նախագիծը։ Ես կարծում եմ, որ դա քննարկված ամենակարևոր փաստաթղթերից է։ Այսօր ընդունվել են որոշումներ այն մասին, որ առաջիկա երկու հանդիպման ժամանակ (որոնք տեղի կունենան օգոստոսի 12-ին Սոչիում և հոկտեմբերի 28-ին Մինսկում) մենք կփորձենք ավարտել այդ փաստաթղթերը։ Դա միության մաքսային օրենսգրքի նախագիծն է և մի շարք փաստաթղթեր, որոնք կարևոր նշանակություն ունեն հետագա զարգացման համար։ Հանդիպումը տեղի է ունեցել կառուցողական երկխոսության մթնոլորտում, և ես համոզված եմ, որ դա կօգնի մեր միության հետագա զարգացմանը»,- ասաց Մասիմովը։
ԵՏՀ կոլեգիայի ղեկավար Տիգրան Սարգսյանն էլ հայտարարեց, որ նավթի և նավթամթերքի միասնական շուկայի ձևավորման փաստաթղթով կարելի է փաստել, որ ձեռք է բերվել համաձայնություն, և փաստաթուղթը նախագահների հաստատմանը կներկայացվի այս ամսվա վերջին Աստանայում։
«2016թ.-ը հայտարարված է միջազգային ինտեգրացիոն միավորումների, երրորդ երկրների հետ հարաբերությունների, զարգացման և խորացման տարի` տնտեսական հարաբերությունների մասով։ Այս տեսանկյունից օրակարգային առաջին հարցը քննարկվել է այսօր, այն է, թե ինչպես ենք իրար հետ սկսելու տնտեսական հարաբերությունների մեկնարկի շուրջ բանակցություններ վարել։ ԵՏՄ-Չինաստան հարաբերությունները սկզբունքային նշանակություն ունեն, այսօրվա հանդիպումները ցույց տվեցին, որ վարչապետները հստակ պատկերացում ունեն այդ գործընթացի մեկնարկի մասին, թե ինչպես ենք մենք կառուցելու երկխոսությունը։
«Առաջնային նպատակը մեր երկրների տնտեսվարողների համար ավելի բարենպաստ պայմաններ ստեղծելն է, և համոզված ենք, որ տնտեսական հարաբերությունները զարգացնելու մեծ ներուժ կա։ Երկրորդ հայեցակարգը, որը վերջնականապես հաստատվել է, նավթի և նավթամթերքի միասնական շուկայի ձևավորումն է։ Հարցն անցած նիստին է քննարկվել և այսօր կարող ենք փաստել, որ համաձայնությունը ձեռքբերված է և այն կներկայացնենք նախագահների հաստատմանը ամսվա վերջին Աստանայում»,- ասաց Սարգսյանը։
Օրակարգում էին նաև հարցեր, որոնք առնչվում էին ԵՏՄ տարածքների տարբեր ոլորտներին։ Սկզբունքային փաստաթուղթ է միասնական մաքսային օրենսգիրքը, որի շուրջ պայմանավորվածություն կա։ Մնում է որոշ հարցեր քննարկել Սոչիում, և արդեն հաջորդ հանդիպմանը վերջնական փաստաթուղթ կստորագրվի։
