ԵՐԵՎԱՆ, 20 մայիսի- Sputnik. ԵՏՄ անդամ երկրների և Չինաստանի հետ համագործակցության իրավական ամրագրումը թույլ կտա ոչ միայն ավելացնել առևտրի ծավալը, այլ նաև ներդրողներ ներգրավել խոշոր ենթակառուցվածքային նախագծերի համար, դիվերսիֆիկացնել մեր լոգիստիկ հնարավորությունները, Եվրասիական միջկառավարական խորհրդի նիստում հայտարարել է Հայաստանի վարչապետ Հովիկ Աբրահամյանը։
«Կարևոր է կապակցել եվրասիական նախագիծն ու Չինաստանի` Մետաքսե ճանապարհ ստեղծելու նախաձեռնությունը, որը Եվրոպան և Ասիան կկապի տարբեր երթուղիներով` ԵՏՄ երկրների միջոցով, ինչպես Հայաստանի, այնպես էլ Իրանի ու Հնդկաստանի»,- ասաց Աբրահամյանը։
Հայաստանի վարչապետը նշեց, որ Հայաստանը, լինելով ԵՏՄ միակ երկիրը, որը ցամաքային ճանապարհ ունի Իրանի հետ և համագործակցության պատմական փորձ` այդ երկրի հետ, պատրաստ է նախագծի իրագործմանը։
«Միջազգային և բազմաձևաչափ փոխգործակցության ընդլայնումը, ԵՏՄ սերտ առևտրատնտեսական համագործակցությունն առանձին վերցրած երկրների հետ մեծ նշանակություն ունի։ Դա կարող է ԵՏՄ-ին զարգացման ավելի բարձր մակարդակ տանել»,- ասաց Աբրահամյանը։
Հայաստանի վարչապետի առաջարկին աջակցեց Ռուսաստանի կառավարության ղեկավար Դմիտրի Մեդվեդևը։ Նա նշեց, որ չպետք չձգձգել ԵՏՄ շրջանակում Չինաստանի հետ համագործակցության վերաբերյալ բանակցությունները։ Ներդրումային համագործակցության ընդլայնման և նոր ինդուստրիալ ոլորտներում փոխգործակցության հնարավորություն կա։
«Մենք հենց նոր համաձայնեցրել ենք Չինաստանի հետ բանակցությունների դիրեկտիվները։ Հանձնաժողովներն ու չինական կողմը չպետք է ձգձգեն բանակցությունների գործընթացը և մտածեն ապագայի մասին։ Կարծում եմ, որ մոտ ապագայում մենք կարող ենք զգալիորեն ընդլայնել փոխգործակցության բոլոր ձևերը, ներառյալ` ներդրումները տնտեսության հատվածներում, ամրագրել փոխգործակցությունը նոր ինդուստրիալ ոլորտներում», —ԵՏՄ միջկառավարական խորհրդի նիստում ասել է Մեդվեդևը։
«Մենք արդեն գնում ենք այդ ուղղությամբ։ Մեր մյուս գործընկերների հետ, ինչպես հայտնի է, նրանք այժմ գտնվում են ՌԴ-ում, այդ թվում Վիետնամի ղեկավարության հետ, մասնավորապես` վարչապետի։ Պետք է արագացված սխեմայով վավերացնենք Վիետնամի հետ ազատ առևտրի համաձայնագիրը», — ընդգծել է ռուսական կառավարության ղեկավարը։
