ԵՐԵՎԱՆ, 19 մայիսի — Sputnik. Հայաստանում իրավական առումով մենաշնորհ չկա, այդ մասին մայիսի 19-ին ՀՀԿ ԳՄ նիստից հետո լրագրողներին ասաց ԱԺ փոխնախագահ, ՀՀԿ մամուլի քարտուղար Էդուարդ Շարմազանովը։
Նա պարզաբանեց, որ գոնե թղթի վրա հավասար պայմաններ են։
«Իրավական առումով մենաշնորհ չկա։ Իրականության մեջ ես մասնագետ չեմ, ես չեմ այն պաշտոնյան, որ այդ մասին պիտի խոսեմ»,- ասաց նա։
Շարմազանովի կարծիքով` տնտեսական բարեփոխումները ոչ թե նոր են սկսվել կառավարության կողմից, այլ դեռևս փետրվարի 12-ին նախագահը տվել է հստակ տեսլականը, որին պետք է ձգտի նոր Սահմանադրությամբ ապրող Հայաստանը։
«Կառավարությունն էլ իրականացնում է այն քայլերը, որոնք տրվել են նախագահի հանձնարարականով»,- ասաց Շարմազանովը։
Դիտարկմանը, թե ինչպես իշխանությունը կարող է պայքարել մոնոպոլիստների դեմ, որոնք կապված են նույն այդ իշխանության հետ, Շարմազանովը պատասխանեց, որ այդ հարցի շուրջ ավելի կոմպետենտ գործիչներն ավելի ամբողջական խոսել են։
«Կոռուպցիան եղել է, և կոռուպցիայի դեմ պայքարը գնացել է։ Ես չէ, որ պետք է գնահատականներ հնչեցնեմ պայքարի որակի մասին, կա հասարակություն, կան փորձագետներ, վերջապես կան ընտրություններ, և հասարակությունն ինքն է որոշում՝ հավատա՞լ, թե՞ոչ»,- նշեց նա։
