ԵՐԵՎԱՆ, 19 մայիսի — Sputnik. Մասնագիտությամբ ուրոլոգ ՀՀ առողջապահության նախարար Արմեն Մուրադյանը համագումարի բացման արարողությանը խոստացավ, որ այսուհետ ավելի է կարևորելու հատկապես թերապևտների աշխատանքը, որոնք հիվանդին կարող են սովորեցնել առողջ ապրելակերպի կանոնները:
Նախարարի խոսքով՝ համագումարի նպատակն է ընդհանուր մոտեցումներ մշակել հատկապես սրտի, թոքերի, երիկամների և էնդոկրին համակարգի հիվանդությունների բուժման և կանխարգելման բնագավառում:
«Փաստացի այս գիտաժողովը ՀՀ առողջապահության նախարարության հավաստագրման կենտրոնի կողմից 16 կրեդիտ է ստանալու: Շարունակական մասնագիտական զարգացման մասին նոր օրենքով 2021 թվականից բժիշկներն իրավունք են ունենալու բժշկել միայն համապատասխան կրեդիտների քանակը հավաքելու դեպքում»,- ասաց նախարարը` հիշեցնելով, որ շարունակական զարգացումը ենթադրում է նաև նմանօրինակ կրթական ծրագրերի մասնակցություն:
Երևանում անցկացվող եռօրյա համագումարին ԵՏՄ անդամ երկրներից շուրջ 80 մասնագետ է մասնակցում:
Թերապևտների եվրասիական ասոցիացիայի գլխավոր քարտուղար, Ալեքսանդր Հարությունովը համագումարի բացման արարողության ավարտին լրագրողներին տեղեկացրեց, որ այս տարի Հայաստան են ժամանել մասնագետներ Ռուսաստանի Դաշնությունից, Ղազախստանից, Ղրղըզստանից և Տաջիկստանից, թեև Ասոցիացիայի անդամ են նաև Ուզբեկստանը, Մոլդովան ու Մոնղոլիան: Բանակցություններ են տարվում նաև Իրանի, Վիետնամի և Մյանմարի անդամակցության շուրջ:
Ի դեպ, ի թիվս օրակարգային այլ հարցերի, ՀՀ առողջապահության նախարար Արմեն Մուրադյանը հատկապես կարևորեց հակաբիոտիկների անվերահսկելի կիրառման կանխարգելմանն ուղղված միջոցառումների իրականացումը:
Արմեն Մուրադյանը նշեց, որ «հակաբիոտիկների անվերահսկելի օգտագործումը կարող է հանգեցնել ոչ միայն առողջապահական, այլև տնտեսական կորուստների»: Վերջինը հատկապես վերաբերում է գյուղացիական տնտեսություններում անասունների բուժման մեջ կիրառվող հակաբիոտիկների հնարավոր հետևանքներին:
«Հակաբիոտիկների ռացիոնալ, ճիշտ կիրառումը կարող է հետագայում զերծ պահել դեղակայունությունից: Բժշկական հիﬓարկներում հակաբիոտիկաթերապիայի ոչ ռացիոնալ կիրառումը կարող է հանգեցնել առողջական լրջագույն խնդիրների: Այս հարցը նոր չի քննարկվում աշխարհում, ապացուցված խնդիր է, հակաբիոտիկները պետք է ﬕﬕայն ցուցուﬓերով օգտագործվեն, իսկ դեղատներից բաց թողնվեն ﬕﬕայն դեղատոմսերով»,- լրագրողների հետ զրույցում նշեց նախարարը` նշելով, որ ԱԺ-ն օրերս երրորդ ընթերցմամբ ընդունեց դեղերի մասին նոր օրենքի նախագիծը, որի համաձայն՝ հակաբիոտիկներն այսուհետ պետք է վաճառվեն բացառապես դեղատոմսերով: Իսկ օրենքը խախտողները կենթարկվեն վարչական պատասխանատվության:
Արմեն Մուրադյանը կարևորեց նաև ԵՏՄ տարածքում դեղերի շրջանառության ընդհանուր հարթակի ձևավորումը և այդ բնագավառում առկա հակասությունների ու խոչընդոտների վերացումը:
