ԵՐԵՎԱՆ, 19 մայիսի — Sputnik. Ծառայության ընթացքում վիրավորված զինվորների բուժումն անհրաժեշտության դեպքում արտերկրում իրականացնելու մասին վերջերս ընդունված օրենքը որքանո՞վ կկիրառվի ԼՂՀ-ում ապրիլյան պատերազմում լուրջ վիրավորում ստացած ու ծանր վիճակում գտնվող զինվորների նկատմամբ: Sputnik Արմենիայի հարցին ի պատասխան ՀՀ առողջապահության նախարար Արմեն Մուրադյանը պատասխանեց.
«Այն ցանկությունը, որ ուզում են փոխել բուժհաստատությունը, տանել այլ երկիր, կարծում եմ՝ իրենց իրավունքն է, և եթե անգամ մենք այս որոշմանը չենք կարող անդրադառնալ կառավարության որոշման շրջանակում, մեր պարտքն ենք համարում բոլոր հնարավոր մեխանիզմներով, քննարկումներով, բարերարների հետ աշխատանքներով, դիվանագիտական խողովակներն օգտագործելով մեր տղաների և ծնողների կողքին լինել»:
Այդուհանդերձ, բժիշկներն այս պահին խորհուրդ չեն տալիս տեղափոխել վիրավոր զինծառայողներին` խուսափելու համար վիճակի վատթարացման հնարավորությունից:
«Չեմ կարծում, որ այսօր տեղափոխումը հնարավոր է՝ հաշվի առնելով վրա հասած բարդությունները, որոնք փաստացի բերեցին նոր վիրահատության,- ասաց նախարարը` ներկայացնելով Արման Լազգինյանի առողջական վիճակի որոշ մանրամասներ:- Նրա վիճակն այս պահին թույլ չի տալիս քննարկել տեղափոխման հնարավորթյունը: Երկու օր է անցել վիրահատությունից: Նրա մոտ սթրես խոց էր բացվել, կարծում եմ, որ այդ հետևանքը չեզոքացնելուց հետո նորից տեղափոխման հարցը քննարկվելու է: Առայժմ հետվիրահատական ապաքինման շրջանում է գտնվում Արմանը»:
Արմեն Մուրադյանը նաև նշեց, որ գրեթե ամեն օր հանդիպում է վիրավոր զինվորների ծնողների հետ: Մեր հարցին, թե այդ և մասնավորապես` երեկվա հանդիպման ընթացքում հաջողվել է համոզել ծնողներին առայժմ չշտապել տեղափոխման հարցում, Արմեն Մուրադյանն ասաց.
«Համոզելու խնդիր չունենք: Մենք բոլոր պարագաներում մեր տղաների, նրանց ծնողների կողքին ենք՝ անկախ նրանից, թե ինչպիսի հնարավորություններ կան օրենսդրական դաշտում»:
Արմեն Մուրադյանը նաև նշեց, որ ԼՂՀ-ում վիրավորված զինծառայողներին աջակցելն իրենց բարոյական պարտքն են համարում:
