ԵՐԵՎԱՆ, 18 մայիսի — Sputnik. Ազատ տնտեսական գոտիների ստեղծման և դրանցում գործունեության ծավալման նպատակը պետք է լինի Հայաստանի տնտեսության դիվերսիֆիկացիան և մրցունակ ոլորտներում Հայաստանի տնտեսության առաջանցիկ զարգացումը: ԱԺ-ում կառավարության հետ հարցուպատասխանի ժամանակ ասաց ՀՀ էկոնոմիկայի նախարար Արծվիկ Մինասյանը
«Այս պահի դրությամբ մենք ունենք երկու ազատ տնտեսական գոտի, որոնցից մեկը մասնագիտացած է բարձր տեխնոլոգիաների ոլորտում, և այստեղ ցուցանիշները տպավորիչ են այն առումով, որ ոչ միայն շահագործող կազմակերպությունների թիվն անընդհատ աճում է, այլ նրանց կողմից ստեղծվող նոր արժեքներ են ստեղծում, որ միտված են արտահանման»,- ասաց նախարարը:
Արծվիկ Մինասյանի խոսքով՝ ազատ տնտեսական մյուս գոտին մասնագիտացած է ոսկերչության ոլորտում:
«Այստեղ մենք նույնպես ունենք դրական զարգացումներ: Այստեղ շահագործողներ են գալիս օտարերկրյա ներդրումները: Մեծ մասն ազգությամբ հայեր են, բայց գործում են օտարերկրյա ներդրումներով: Դուք գիտեք, որ ազատ տնտեսական գոտիների պայմանները ոչ միայն ներդրումներն են, այլ նաև աշխատատեղերի ստեղծումն է: Եթե այս ցուցանիշները համախառն գնահատենք, ապա ակնկալվում է, որ շուրջ 100 միլիոն դոլարի ներդրում է իրականացվելու առաջիկայում: Ստեղծվելու է նաև շուրջ 2000 աշխատատեղ: Այս ամենը նպաստելու է մեր տնտեսության մեջ ոլորտային զարգացումներին»,- ընդգծեց նախարարը:
