ԵՐԵՎԱՆ, 18 մայիսի — Sputnik. Այն կամավորները, որոնք մարտական գործողությունների ժամանակ զոհվել են կամ վիրավորվել, համապատասխան որոշման համաձայն՝ օգտվում են զինծառայողների պաշտպանության՝ այսօր գոյություն ունեցող բոլոր օրինական արտոնություններից, ասաց ՀՀ պաշտպանության նախարար Սեյրան Օհանյանը:
«Այժմ դիրքերում գտնվող կամավորների ծառայությունը և աջակցությունը բանակին կամավոր իրավունքի շրջանակներում է: Նրանք այնտեղ կամավոր են ընդգրկված ու ցանկության դեպքում կարող են հետ վերադառնալ: Այս պարագայում բանակի ղեկավարությունը, պաշտպանության բանակի հետ համագործակցության և փոխադարձ օգնության շրջանակներում, համապատասխան քայլեր ենք ձեռնարկում իրավիճակին համարժեք որոշումներ ընդունելու համար»,- նշեց նա։
ԱԺ ՀԱԿ խմբակցության պատգամավոր Գագիկ Ջհանգիրյանի այն դիտարկմանը, թե կամավորների ծառայության ընթացքում կարող են լինել նաև ոչ կանոնադրական միջադեպեր, Օհանյանը պատասխանեց.
«Փորձը ցույց է տվել, որ մարտական գործողությունների ժամանակ հանցագործությունները, տարբեր տեսակի խախտումները քիչ են լինում: Մենք համապատասխան քննարկումներ կատարել ենք, նաեւ այսօր ուսումնասիրում ենք, որպեսզի քննարկենք ընդհանուր ռեզերվում գտնվող զորահավաքային ռեսուրսի համար կամավորական ծառայողի, կամավորական ստորաբաժանումների առկայության հարցեր: Այսինքն, այդ խնդիրները եւս ուսումնասիրման առարկա են»:
Ինչ վերաբերում է Հայաստանյան հատվածի կամավորականներին, ապա, Օհանյանի խոսքով, հարցը նաև իրավական ոլորտում է քննարկվում:
Նախարարը նշեց, որ կան խնդիրներ, որոնք առանձին լուծում են պահանջում, և կան խնդիրներ, որոնք, զինվորական ծառայության առանձնահատկություններից ելնելով, հրապարակային չեն:
