ԵՐԵՎԱՆ, 18 մայիսի- Sputnik. Հայաստանում 2016թ.-ին տնտեսական աճը կաննատեսվում է 3,2%-ի մակարդակում, Ազգային ժողովում հարցուպատասխանի ժամանակ ասաց փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը:
«Կանխատեսումների համաձայն՝ այս տարի տնտեսական աճը կկազմի 3,2%: Ընթացիկ տարվա առաջին եռամսյակի առանձնահատկությունն արտահանման տեմպերի աճն է: Հայաստանում արտահանման և ներկրման հարաբերակցությունը երբեք այդքան մոտ չի եղել, ինչպես 2016թ.-ի առաջին եռամսյակում»,- ասաց Գաբրիելյանը:
Խոսելով 2017թ.-ի մակրոտնտեսական իրավիճակի մասին՝ Գաբրիելյանը նշեց, որ այժմ բարդ է ստույգ կանխատեսումներ անել, սակայն վստահություն կա, որ հաջորդ տարի նույնպես աճ կգրանցվի:
Նրա խոսքով՝ արդեն այն, որ 2016թ.-ի իրական ցուցանիշներն ավելի բարձր են, քան կանխատեսվել էր, խոսում է երկրի տնտեսության կայուն դրության մասին:
Հայաստանի պետբյուջեի համաձայն՝ Հայաստանում 2016թ.-ին նախատեսված է ՀՆԱ-ի 2,2% աճ: Տարբեր միջազգային կազմակերպությունների կանխատեսումները տատանվում են 2-2,5%-ի միջակայքում:
