ԵՐԵՎԱՆ, 18 մայիսի- Sputnik. «Դեղերի մասին» օրենքի ընդունումից հետո Հայաստանում դեղերի գները պետք է նվազեն, ասաց Հայաստանի առողջապահության նախարար Արմեն Մուրադյանը ԱԺ-ում:
«Առաջին անգամ Հայաստանում օրենքով ամրագրվել է, որ պետությունը խառնվելու է դեղերի շուկային: Այսինքն, պետությունը սկսելու է կանոնավորման գործընթաց առողջապահության նախարարության կողմից փոխհատուցվող դեղերի վերաբերյալ: Այս ամբողջ գործընթացը որակապես փոխելու է իրավիճակը և բերելու է խստացման»,- ասաց Մուրադյանը:
Նա նշեց, որ պետությունը առողջապահության նախարարության կողմից փոխհատուցվող դեղերի կանոնավորման գործընթաց է սկսելու, իսկ 2025թ.-ից փոխհատուցվող դեղերը կանոնավորելու է պոլիկլինիկաների և հիվանդանոցների հետ:
Նրա կարծիքով՝ չգրանցված, կեղծված դեղեր հայտնաբերելու համար նախատեսված վարչական տույժերը խստացվելու են, ինչն էլ դեղերի որակի բարձրացման և գների նվազման է հանգեցնելու:
Ինչ վերաբերում է մենաշնորհներին, ապա Մուրադյանի կարծիքով՝ մեծածախ և մանրածախ ցանցերի տարանջատումն էլ տնտեսվարող սուբյեկտների համար հավասար պայմանների ստեղծման կհանգեցնի:
Պատգամավոր Էդմոն Մարուքյանը կարծիք հայտնեց, որ նոր օրենքի ընդունումից հետո դեղերը կթանկանան՝ չնայած նրան, որ հարևան Վրաստանի համեմատ գների տարբերությունն առանց այդ էլ զգալի է:
Մուրադյանը պատասխանեց, որ գների տարբերությունը կախված է հարկումից (ԱԱՀ-ի բացակայություն), ինչպես նաև ավելի քիչ լոգիստիկ ծախսերից: Հայաստանում դեղերի ներմուծումն իրականացվում է ինքնաթիռով, իսկ Վրաստանում՝ ծովային ճանապարհով, ավտոմեքենաներով:
Առողջապահության ոլորտում ղեկավար մարմինների հիմնական փաստարկն այն է, որ նոր օրենքի համաձայն՝ կկազմվի դեղերի ցուցակ, որոնց արժեքը կփոխհատուցի պետությունը, ինչն իր հերթին կզսպի գները շուկայում:
Մյուս կողմից, օրենքի համաձայն, ենթադրվում է դեղատնային գործունեության և մեծածախ առևտրի բաժանում (տարբեր լիցենզիաներ գործունեության յուրաքանչյուր տեսակի համար) և զուգահեռ ներկրման թույլտվություն (միջնորդներից դեղերի գնում լավագույն գնով): Օրենքին դեմ հանդես եկողները կարծում են, որ այն ընդունելուց հետո շուկայում էլ ավելի կմեծանա մոնոպոլիզացիան:
