ԵՐԵՎԱՆ, 18 մայիսի-Sputnik. Վիեննայում կայացած հանդիպումից հետո Սերժ Սարգսյանը լրագրողների հետ զրույցում նշել է, որ ԵԱՀԿ Մինսկի խմբի համանախագահները կողմ են, որ Ղարաբաղյան հակամարտության գոտում մոնիթորինգի ռեժիմ հաստատվի։ Խոսելով սահմանային մոնիթորինգի ներդրման ժամկետների մասին՝ նախագահը հայտնել է, որ դա կլինի կարճ ժամանակահատվածում, միայն թե պետք չէ իրադարձություններն արհեստականորենառաջ մղել։ Հայ դատի և քաղաքական հարցերի գրասենյակի պատասխանատու Կիրո Մանոյանը կարծում է, որ մինչև կողմերի հաջորդ հանդիպումը մեխանիզմների հստակեցում պետք է արվի։
«Հիմա համանախագահողներն ասում են, որ կողմերը համաձայնեցին հնարավորինս շուտ այդ մեխանիզմն առաջ բերել։ Եթե Ադրբեջանը մերժի որևէ մեխանիզմի տեղադրման առաջարկ ներկայացնել, դա արդեն կտապալվի։ Կողմերը պետք է ճշտեն հարմար մեխանիզմը»,- ասաց Կիրո Մանոյանը։
Կիրո Մանոյանը կարևոր է համարում մի հանգամանք. ԵԱՀԿ Մինսկի խմբի համանխագահող երկրները շահագրգիռ են, որ պատերազմ չլինի, դրա համար հնարավորինս արագ միջնորդեցին ու կազմակերպեցին Վիեննայի հանդիպումը։ Ալեքսանդր Մանասյանն էլ կարծում է, որ այն ձևաչափը, որի մեջ դրված է հակամարտության խնդիրը, փակուղային է։
«Արևմտյան խոշոր տերությունները հիմքում դրել են երկու` ազգերի ազատ ինքնորոշման և տարածքային ամբողջականության սկզբունքը` հայտարարելով, որ դրանք իրար հավասար և իրար փոխբացառող սկզբունքներ են։ Խնդիրը դրել են փակուղու մեջ, հետո մեզանից պահանջում են այդ փակուղում առաջընթաց ապահովել. անհնար է»,- ասաց նա։
Մանասյանի այլընտրանքային լուծումն է` տեղեկատվական պատերազմներում այնպիսի բանաձևեր մշակել, որոնք կարող են շրջանցել այդ փակուղին կամ ճեղքել այն։ Բանախոսներն իրենց խոսքը եզրափակեցին հույսով, որ քառօրյա պատերազմը հստակ ուղենշեց բացթողումներն ու դրանք սրբագրելու մղեց։
