ԵՐԵՎԱՆ, 17 մայիսի — Sputnik. Ըստ «Դեղերի մասին» նոր օրենքի` պետությունն առաջին անգամ իր վրա դեղամիջոցների շրջանառության կարգավորման պատասխանատվություն կվերցնի, Sputnik Արմենիա պորտալին ասաց առողջապահության նախարար Արմեն Մուրադյանը։
«Այդ օրինագիծը կկարգավորի դեղերի շրջանառության ոլորտի շատ հարցեր, այդ թվում` ապահովելով դրանց որակը և մատչելիությունը։ Առաջին անգամ պետությունը կմիջամտի դեղերի գնի կարգավորման գործընթացին»,- ասաց Մուրադյանը։
Նրա խոսքով` կվերահսկվի դեղերի շրջանառությունը` սկսած արտադրությունից մինչև քաղաքացիներին վաճառքը (գների կարգավորում, վարչական տույժեր, դեղերի տրամադրում ըստ դեղատոմսի)։
Նա նշեց, որ այժմ արտոնագիր պետք է ստանան ինչպես մեծածախ, այնպես էլ մանրածախ առևտրով զբաղվողները։
«Դրանք պետք է տարբեր իրավաբանական անձինք լինեն»,- ասաց Մուրադյանը։
Առողջապահության ոլորտի ղեկավարների հիմնական փաստարկները հօգուտ նոր օրենքի այն են, որ կկազմվի այն դեղամիջոցների ցանկը, որոնց արժեքը կփոխհատուցի պետությունը, ինչն էլ իր հերթին կզսպի դրանց գինը շուկայում։
Մյուս կողմից, օրենքի համաձայն, ենթադրվում է դեղատնային գործունեության և մեծածախ առևտրի բաժանում (տարբեր լիցենզիաներ գործունեության յուրաքանչյուր տեսակի համար) և զուգահեռ ներկրման թույլտվություն (միջնորդներից դեղերի գնում լավագույն գնով):
Նման օրենքի հակառակորդները կարծում են, որ դրա ընդունումը կհանգեցնի շուկայի էլ ավելի մենաշնորհացման:
