ԵՐԵՎԱՆ, 17 մայիսի — Sputnik. Լեհ գործարարներին հետաքրքրել է Հայաստանի տեղեկատվական տեխնոլոգիաների ոլորտը, երեքշաբթի լրագրողներին ասաց Լեհաստանի զարգացման նախարարի տեղակալ Ռադոսլավ Դոմագալսկի-Լամբեձկին նիստից առաջ: Նա նշեց, որ Հայաստանում շատ բարենպաստ ներդրումային մթնոլորտ է, ինչպես նաև գոյություն ունի հատուկ ստեղծված դաշտ արտասահմանյան ներդրումների համար:
«Ես կարծում եմ, որ այս պարագայում պետք է դրական մտածել և ներդրումների ծավալների ավելացման հույս ունենալ: Նաև հուսով ենք, որ հայկական բիզնեսը կսկսի գործել Լեհաստանում», — նշեց Դոմագալսկի- Լամբեձկին:
Հայաստանի էկոնոմիկայի փոխնախարար Գարեգին Մելքոնյանն իր հերթին նշեց, որ սա միջոցառումների այն ձևաչափն է, որը թույլ է տալիս հայ-լեհական հարաբերությունների շրջանակում բոլոր ոլորտներում քննարկել տարբեր համագործակցության ծրագրեր:
«Շատ կարևոր է ներգրավել մասնավոր հատվածին քննարկման գործընթացում: Նաև հույս ունենք, որ նաև մասնավոր հատվածի հետ պայմանավորվածություններ ձեռք կբերվեն: Այսօր մենք արդեն ունենք բիզնես-ծրագրերի հաստատում, մասնավորապես, տուրիզմի, էներգետիկայի, տեխնոլոգիական փոխադրումների, գյուղատնտեսության: Մենք նաև նախատեսում ենք փոխանակել արտակարգ իրավիճակների ոլորտում ունեցած փորձը», — նշեց Մելքոնյանը:
Փոխնախարարն ավելացրեց, որ քննարկումների շրջանակում լեհ գործարարներին կներկայացվի հայկական օրենսդրությունը, տնտեսական վիճակին վերաբերող տվյալները և շուկայի առկա իրավիճակը:
«Արդեն այսօր Լեհաստանից Հայաստան ժամանած գործարարների շարքում կան ներդրումներով հետաքրքրվող անձինք: Հայ-լեհական արդյունավետ գործարար համագործակցության շրջանակում հնարավոր է նաև նոր աշխատատեղերի ստեղծում», — ասաց Մելքոնյանը:
Նա նաև ավելացրեց, որ ԵՏՄ-ին Հայաստանի անդամակցությունը չի ազդել Հայաստանի և Լեհաստանի միջև ապրանքաշրջանառության վրա, որը տարեկան շուրջ 50 մլն դոլար է կազմում:
Մելքոնյանն ավելացրեց, որ բացի այս` Հայաստանը կարող է տարանցիկ երկիր դառնալ Լեհաստանի և Իրանի միջև:
Երևանում ընթանում է հայ-լեհական տնտեսական համագործակցության միջկառավարական հանձնաժողովի հինգերորդ նիստը։
