ԵՐԵՎԱՆ, 17 մայիսի — Sputnik. Քաղաքական ոլորտում կնոջը տղամարդու հետ հավասար իրավունքներ ու հնարավորություններ տրամադրելու անհրաժեշտությանը նվիրված ցուցահանդես է բացվել ԱԺ-ում:
«Հասարակական հատվածում, ոչ պետական կազմակերպություններում մենք մեծ ներուժ ունենք, և կանայք լուրջ աշխատանքներ են կատարում», — ասաց խորհրդարանի փոխխոսնակ, իշխող ՀՀԿ խմբակցության անդամ Հերմինե Նաղդալյանը:
Նրա խոսքով` վերջին տարիներին կանանց մասնակցությունը երկրի հասարակական կյանքում կտրուկ աճել է:
Նաղդալյանը միաժամանակ ընդգծեց, որ կանանց մեծ մասը գործող խորհրդարանում հենց իշխող ՀՀԿ-ից են:
Հայաստանի խորհրդարանի 131 պատգամավորներից 13-ը կին է, ընդ որում` նրանցից 8-ը ՀՀԿ խմբակցության անդամներն են:
«Հավասար» վերնագրով լուսանկարչական ցուցահանդեսը նախաձեռնել են «ՕՔՍՖԱՄ»-ի հայաստանյան գրասենյակն ու «ՕքսԵՋեն» հիմնադրամը: Սա «ՕՔՍՖԱՄ»-ի «EVEN IT UP» գլոբալ ծրագրի մի մասն է:
Ինչպես պնդում են կազմակերպիչները, ցուցադրության նպատակն է բարձրացնել քաղաքական կյանքում կնոջ ակտիվության կարևորության հարցը, խոսել այն քայլերի մասին, որոնք կնպաստեն օրենսդիր մարմնում կանանց թվի ավելացմանը:
Ցուցահանդեսի միջոցով կոչ է արվում հավասար իրավունքներ և հնարավորություներ ստեղծել կանանց և տղամարդկանց համար:
