ԵՐԵՎԱՆ, 17 մայիսի — Sputnik, Մարինե Ավանեսյան. Բնակլիմայական պայմանների` ուժեղ քամու և կարկուտի հետևանքով վնասվել է Երևան-Սևան մայրուղու 32-րդ կմ-ի վրա գտնվող «Ճանապարհաշինարարներին» հուշարձանի վերևի` դեռևս կանգուն մնացած հատվածը:
Հուշարձանի հեղինակը Դավիթ Բեջանյանն է, այն կառուցվել է 1978թ.-ին:
«Պահպանության ծառայություն» ՊՈԱԿ-ի ՊՄՊ Կոտայքի մարզային ծառայության աշխատակիցները երեքշաբթի առավոտյան կատարած շրջայցի ընթացքում արձանագրել են, որ հուշարձանն ամբողջովին շրջվել և կախվել է, ինչն իրենից լուրջ վտանգ է ներկայացնում, քանի որ ամեն վայրկյան կարող է պոկվել ու ցած ընկնել: Հուշարձանի ներքևի հատվածից էլ 3 մետր երկարությամբ և 1 մետր լայնությամբ մի կտոր պոկվել ու ընկել է գետնին:
Հուշարձանի վնասված հատվածը ՊՄՊ Կոտայքի մարզային ծառայության պատասխանատուները և ՀՀ Ոստիկանության Չարենցավանի բաժնի աշխատակիցները հեռացրել են` տեղափոխելով Չարենցավանի հաստոցաշինական գործարանի տարածք:
![Разбитый памятник Лента бесконечности Давида Беджаняна Разбитый памятник Лента бесконечности Давида Беджаняна - Sputnik Արմենիա](https://cdn.am.sputniknews.ru/img/1887/52/18875287_0:0:1000:750_600x0_80_0_0_45dbaabaafc309f03e0ff1471f01678f.jpg)
Նշենք, որ հուշարձանի կողոպտումը սկսվել էր դեռևս 2007թ.ից: 2009-ին ոստիկանությունը հայտնաբերել էր երեք իրավախախտների, քրեական գործ էր հարուցվել, սակայն, վնասը չփոխհատուցվեց, հուշարձանը չվերականգնվեց:
Հուշարձանի նկատմամբ իրավախախտում էր արձանագրվել նաև 2012 և 2013 թվականներին: Այն հերթական «փորձությանն» էր ենթարկվել 2015 թ. հուլիսի 12-ին. ուժգին քամուց պոկվել էր տարիներ շարունակ բազմակի կողոպուտներից խարխլված հուշարձանի ստորին հատվածը: Չարենցավանի քաղաքապետի համաձայնությամբ` պոկված հատվածը ՊՈԱԿ-ի աշխատակիցների վերահսկողությամբ տեղափոխվել էր Չարենցավանի քաղաքապետարանի կոմունալ ծառայության տարածք` ժամանակավոր պահպանության, որտեղ և պահվում է մինչ օրս: