ԵՐԵՎԱՆ, 17 մայիսի — Sputnik. ԵԿՄ անդամներն այսօր ասուլիս էին հրավիրել` հերքելու Մանվել Գրիգորյանի մասին մամուլում տարածված լուրերն այն մասին, որ ԼՂՀ այցելած ԵԿՄ վարչության նախագահը հայհոյել է իր ճանապարհը փակած ԼՂ ՊԲ զինվորներին։
ԱԺ-ում Մանվել Գրիգորյանի օգնական Մեսրոպ Մանուկյանը, որը միջադեպի ժամանակ եղել է Մանվել Գրիգորյանի հետ, պատմեց, որ դեպքը տեղի է ունեցել Ջեբրաիլից վերադառնալու ճանապարհին, երբ Հադրութ չհասած իրենց ճանապարհին կանգնած են եղել «Մերսեդես» և «Օփել» մակնիշի 2 ավտոմեքենա։
«Ստահոդ լուրեր են, որպես այդպիսին` Գրիգորյան Մանվելի ղեկավարությամբ շարասյուն չի եղել, առջևից գնացել է գեներալի ավտոմեքենան, հետևից եղել է ՎԱԶ 21-06, որի մեջ եղել եմ ես և մեր հետևից եղել է շտապօգնության ՈՒԱԶ-ը։ Երկու ավտոմեքենաները կանգնած էին հանդիպակաց ուղղության վրա` դռները բաց»,- պատմում է Մանվել Գրիգորյանի օգնականը` նշելով, որ իրենց նախազգուշացումից հետո կանգնած ավտոմեքենաները տեղից չեն շարժվել։
«Գեներալը, փորձելով շրջանցել, ավտոմեքենաների կողքին կիպ կանգնելով, հորդորել է, սաստել է իրենց, որ չի կարելի ճանապարհը փակել»,- ասաց Մեսրոպ Մանուկյանը`միաժամանակ հավաստիացնելով, որ ավտոմեքենայի մեջ եղած անձինք զինվորներ, զինվորականներ կամ կամավորներ չեն եղել։
Մամուլում տեղ գտած մնացած բոլոր տեղեկությունները, թե Մանվել Գրիգորյանն ու նրա թիկնապահները նաև կրակել են այդ ավտոմեքենաների ուղղությամբ, ԵԿՄ անդամները ևս հերքում են`լրատվամիջոցներին մեղադրելով իրենց ղեկավարի մասին պատվիրված նյութեր գրելու, «թշնամու ջրաղացին ջուր լցնելու» մեջ։
«Կանգնում են այդ լեգենդար հրամանատարին, այդ հրաշք մարդուն ուզում են հողին հավասարեցնել, ուզում են, որ ադրբեջանական թերթերը գրեն, Ադրբեջանի ջրաղացին ջուր են լցնում։ Եվ պետք է այդ սրիկաներին դատի տալ»,- հայտարարեց ԵԿՄ անդամ, ազատամարտիկ Վլադիկ Աբրահամյանը։
Իսկ ԵԿՄ վարչության լրատվության պատասխանատու Վարդան Վարդանյանը նշեց, որ մամուլի հրապարակումներն ուսումնասիրելով` հանգել է այն եզրակացության, որ կազմակերպված հանցախումբ է գործում, որի նպատակն է Մանվել Գրիգորյանին ու ԵԿՄ-ին վարկաբեկելը։
«Հաշվի առնելով այն գործունեությունը, որ ծավալում է ԵԿՄ-ն այս օրերին ու այն առաքելությունը, որ իրականացնում է, այս հանցախումբը սպառնալիք է երկրի ազգային անվտանգությանը»,- նշեց նա։
Ի դեպ, ԵԿՄ անդամները վստահեցնում են, որ այս միջադեպի մասին մամուլին հարցազրույցներ տվող անձինք ականատես չեն և ապացույցներ չունեն, և նրանց առերես հրապարակային բանավեճի են հրավիրում։
