ԵՐԵՎԱՆ, 17 մայիսի- Sputnik. «Եվրատեսիլ 2016» երգի միջազգային մրցույթի արդյունքները վերանայելու պահանջագիրը հրապարակվել է Change.org կայքում, հայտնում է ՌԻԱ Նովոստին։
Փաստաթղթի հեղինակը Երևանի բնակիչ Արթուր Հովհաննիսյանն է, սակայն ուղերձին աջակցել են Մեծ Բրիտանիայի, Ֆրանսիայի, Գերմանիայի, Իսպանիայի, Ավստրալիայի, Սերբիայի, Շվեդիայի, Ռուսաստանի, Ուկրաինայի և այլ երկրների բնակիչները։ Պահանջագրի տակ ավելի քան 29 հազար մարդ է ստորագրել (անհրաժեշտ է 35 հազար ստորագրություն)։
«Մենք հասկանում ենք, որ ժյուրիի և հեռուստալսարանի քվեարկությունը բարդ ու զգացմունքային գործընթաց է, բայց այդ պահանջագրի տակ ստորագրած մարդկանց թիվը ցույց է տալիս, որ շատերն են համոզված, որ այս տարի մրցույթի հաղթող է դարձել ոչ այն մասնակիցը, որը պետք է հաղթեր»,- նշել է նախաձեռնության հեղինակը։
Մադրիդի բնակիչ Քրիստիան Գարիդոն նույնպես պահանջագիր է ներկայացրել Change.org-ում և Իսպանիային հորդորել է հրաժարվել «Եվրատեսիլ 2017»-ի մասնակցությունից։
OpenPetition պորտալի գերմանացի օգտատերերը նույնպես կոչ են արել դադարեցնել Գերմանիայի մասնակցությունը։ Պահանջագրերից մեկի հեղինակի խոսքով` այդ մրցույթն անցկացվում է ոչ թե գեղարվեստական մակարդակով, այլ միայն արտացոլում է քաղաքական տրամադրությունները։
«Եվրատեսիլ» երգի միջազգային մրցույթում Հայաստանը ներկայացնող Իվետա Մուկուչյանը ներկայացավ LoveWave երգով և զբաղեցրեց 7-րդ հորիզոնականը: Առաջին հորիզոնականը զբաղեցրեց Ուկրաինայի ներկայացուցիչ Ջամալան։
Մրցույթի եզրափակիչ փուլին մասնակցեց 26 երգիչ` երկու կիսաեզրափակիչների հաղթողները, ինչպես նաև մրցույթն ընդունող երկրի՝ Շվեդիայի և «մեծ հնգյակի» երկրների ներկայացուցիչները (մրցույթի հիմնադիրներ և գլխավոր հովանավորներ՝ Մեծ Բրիտանիա, Գերմանիա, Իսպանիա, Իտալիա և Ֆրանսիա)։
Հայաստանը «Եվրատեսիլ» մրցույթին մասնակցում է 2006թ.-ից: Լավագույն արդյունքները ցույց են տվել երգչուհի Սիրուշոն 2008թ.-ին (չորրորդ տեղ) և Արամ MP3-ն 2014թ.-ին (չորրորդ տեղ):
