ԵՐԵՎԱՆ, 16 մայիսի — Sputnik. Շանթ Օկնայանը նշանակվել է Մերձավոր Արևելքում, Հյուսիային Աֆրիկայում և Պակիստանում Facebook-ի էլեկտրոնային առևտրի, մանրածախ վաճառքի ու օնլայն ծառայությունների տարածաշրջանային ղեկավար, հաղորդում է telecompaper.com-ը։
Ըստ հաղորդման` Օկնայանը զբաղվելու է նշված տարածաշրջանում էլեկտրոնային, մանրածախ և օնլայն առևտրի զարգացմամբ, համագործակցելու է օգտատերերի հետ, նպաստելու ինտերնետ ծառայությունների որակի բարձրացմանը:
Շանթ Օկնայանն ունի ավելի քան 15 տարվա աշխատանքային փորձ առաջատար բիզնեսի զարգացման ոլորտում: Նա ղեկավարել է Google-ի Փոքր և միջին բիզնեսի համար շուկայի զարգացման թիմը՝ Մերձավոր Արևելքում ու Հյուսիսային Աֆրիկայում: Օկնայանը հիմնադրել է GlamBox սթարթափը:
