ԵՐԵՎԱՆ, 16 մայիսի- Sputnik. Որքան շարունակվում է Լեռնային Ղարաբաղում հակամարտությունը, այնքան ինտենսիվ են զինվում նրա կողմերը, այնքան մեծանում է նոր թեժացման վտանգը` ներառյալ Հայաստանի և Ադրբեջանի միջև պատերազմը, երկուշաբթի Վիեննայում ԵԱՀԿ Մինսկի խմբի հանդիպումից առաջ հայտարարել է ԳԴՀ արտգործնախարար Վալտեր Շտայնմայերը։
Երկուշաբթի երեկոյան Վիեննայում տեղի կունենան ղարաբաղյան հակամարտության կարգավորման ԵԱՀԿ Մինսկի խմբի բանակցությունները Ռուսաստանի, Ֆրանսիայի ԱԳՆ ղեկավարների և ԱՄՆ պետքարտուղարի մասնակցությամբ։
Շտայնմայերի խոսքով` ԵԱՀԿ-ն կարևոր դեր է խաղում հակամարտության կարգավորման մեջ։
«Ֆրանսիան, Ռուսաստանը և ԱՄՆ-ն երկար տարիներ փորձում են որպես Մինսկի խմբի համանախագահներ համախմբել հրադադարի ռեժիմի և քաղաքական գործընթացը վերսկսելու մասին որոշումը։ Գերմանիան` որպես ԵԱՀԿ նախագահ, աջակցում է դրան»,- հավելեց նա։
«Մեր կարծիքով` նպատակը պետք է լինի` ամրապնդել շփման գծում հրադադարի ռեժիմը, համաձայնեցնել վստահության ամրապնդման միջոցները և սկսել բանակցային գործընթացը։ Դա որոշակի ժամանակ կպահանջի, մեկ օրում որոշում չի կայացվի»,- ասել է նախարարը։
