ԵՐԵՎԱՆ, 16 մայիսի — Sputnik. «Արմենիա» միջազգային օդանավակայաններ» ՓԲԸ-ն «Զվարթնոց» օդանավակայանի հին շենքի վերաբերյալ որոշում չունի։ Այս մասին այսօր լրագրողներին հայտնեց գլխավոր տնօրեն Մարսելո Վենդեն` նշելով, որ հիմնական որոշումը կայացրել Արտակարգ իրավիճակների նախարարությունը` շենքը վթարային համարելով։
Այս եզրակացության համաձայն` ինչպես հիշեցրեց Մարսելո Վենդեն, ճանապարհը դեպի կլոր շենքի էստակադա վտանգավոր է և կարող է փլուզվել ցանկացած պահի։
«Մենք կարծում ենք, որ Հայաստանը չպետք է ներդրումներ անի մի բանի մեջ, որն ինքն իրեն քանդվում է»,- ասաց «Արմենիա» միջազգային օդանավակայաններ» ՓԲԸ-ի գլխավոր տնօրեն Մարսելո Վենդեն` ընդգծելով, որ ավելի շատ պետք է կենտրոնանալ նոր ենթակառուցվածքների վրա։
Հիշեցնենք` Երևանի քաղաքապետարանը 2015թ.-ի դեկտեմբերին «Արմենիա» Միջազգային Օդանավակայաններ» ՓԲԸ-ին «Զվարթնոց» օդանավակայանի կլոր մասնաշենքի մասնակի ապամոնտաժման թույլտվություն էր տվել։
Բայց հայ ճարտարապետների ու հատկապես «Զվարթնոց» օդանավակայանի նախագծի համահեղինակ, ճարտարապետ Արթուր Թարխանյանի դստեր Անահիտ Թարխանյանի դժգոհությունից հետո ապամոնտաժումը հետաձգվեց։
Փոխարենը հայ մասնագետները շենքի վերանորոգման ու վերագործարկման տարբերակ են առաջարկել, որը, սակայն, «Զվարթնոց» օդանավակայանի կոնցեսիան կառավարիչը չի ընդունում։
