ԵՐԵՎԱՆ, 14 մայիսի- Sputnik. Հայ-ադրբեջանական սահմանին տիրող իրավիճակը կարող է փոխվել կայծակնային արագությամբ, լրագրողներին ասաց Հայաստանի ԶՈՒ 4-րդ կորպուսի հրամանատար, գեներալ-մայոր Անդրանիկ Մակարյանը: Ավելի վաղ ԶԼՄ-ները տեղեկություն էին հրապարակել, որ Ադրբեջանը ռազմական տեխնիկա է կենտրոնացնում Նախիջևանի սահմանին:
«Մենք այնպիսի հարևաններով ենք շրջապատված կամ, կարելի է ասել, հարևանով, որը ցույց տվեց, որ մենք պետք է պատաստ լինենք ամեն ինչի: Սահմանի իրավիճակը ցանկացած պահի կարող է կայծակնային արագությամբ փոխվել»,- ասաց Մակարյանը լրագրողներին Վայոց Ձորի զորամասեր կատարած շրջայցի ընթացքում:
Նա նշեց, որ հայ-ադրբեջանական սահմանի իրավիճակը նույնպես կարող է սրվել, ինչպես ղարաբաղա-ադրբեջանական սահմանում:
«Մենք պետք է պատրաստ լինենք ամեն ինչի և չհավատանք հակառակորդի այն խոստումներին, որ այդ հատվածում հրադադարի ռեժիմ է պահպանում»,- ասաց Մակարյանը:
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
