ԵՐԵՎԱՆ, 13 մայիսի — Sputnik. «Մենք ենք տերը մեր երկրի» քաղաքացիական նախաձեռնության մի քանի տասնյակ անդամներ բողոքի ակցիա անցկացնելու համար հավաքվել են Հայաստանի նախագահի ամառանոցի մոտ, հայտնում է Sputnik Արմենիայի թղթակիցը։
Ոստիկանության ուղեկցմամբ նրանք անցել են Բաղրամյան պողոտայով և հասել Պռոշյան փողոց` նախագահի ամառանոցի մոտ և կանգ առել փողոցի մյուս կողմում։
Ցուցարարներից ոչ մեկն իրեն ցույցի կազմակերպիչ չի անվանում` կարգուկանոնը խախտելու դեպքում պատասխանատվությունից խուսափելու համար։ Ցուցարարների պահանջները գրված են քաղաքացիական նախաձեռնության ֆեյսբուքյան էջում։
Պահանջների ցանկում ԼՂՀ-ի վերաբերյալ ցանկացած փաստաթղթի ստորագրումից հրաժարվելն է և ստատուս քվոյի պահպանումը։ Ցուցարարները պահանջում են 30 հազարական դոլար հատկացնել Ղարաբաղում զոհված զինծառայողների ընտանիքներին։
Բացի այդ, երթի կազմակերպիչները գրել են իրենց կարծիքով երկիրը թալանած խոշոր օլիգարխների ցանկը, որում 50 անուն են ներառել։ Նախաձեռնության անդամները նաև պահանջում են 10 մլն դոլար վերադարձնել երկրի պետբյուջե։
Ցուցարարները պահանջում են նաև վերադարձնել բոլոր այն ֆինանսական միջոցները, որոնք գտնվում են ԴԱՀԿ-ի նախկին պետ Միհրան Պողոսյանի պանամական հաշիվների վրա։
Ակցիան տևեց շուրջ մեկուկես ժամ, այնուհետև երթի մասնակիցները սկսեցին ցրվել։
