ԵՐԵՎԱՆ, 13 մայիսի — Sputnik. ՀՀ ՊՆ մամուլի քարտուղար Արծրուն Հովհաննիսյանը նշեց, որ միշտ հայտարարվել է 2-3 հարյուր մետրի և ոչ թե քառակուսի մետրի մասին։ Նա հերքեց Ժիրայր Սեֆիլյանի երեկվա հայտարարությունն այն մասին, որ Ադրբեջանը Թալիշում գրավել է շատ ավելի մեծ տարածք, քան հայտարարվում է պաշտոնապես։
Նախօրեին Շուշիի առանձնակի գումարտակի հրամանատար Ժիրայր Սեֆիլյանը հայտարարել էր, որ ապրիլի սկզբին տեղի ունեցած կարճատև պատերազմի ժամանակ հայկական կողմը միայն հյուսիսում՝ Մարտակերտում, 7 միլիոն մետր տարածք է կորցրել։
«Ես ապշում եմ, թե ինչպես կարող է մարդ պնդել, թե այսքան տարածք է կորսվել, հետո ասել՝ ես այնտեղ եմ եղել»,- մեկնաբանելով Ժիրայր Սեֆիլյանի հայտարարությունն՝ ասաց ՊՆ խոսնակը` նշելով, որ ամենամեծ սխալն այս պնդման մեջ ոչ այնքան թվերն են, որքան այն պնդումը, որ այդ դիրքը Թալիշի նկատմամբ ունի ռազմական վերահսկողություն»։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
