ԵՐԵՎԱՆ, 13 մայիսի — Sputnik. Գերմանիայում անցկացվող ցուցահանդեսին Տիգրան Կիրակոսյանը 17 մենատիպ է ներկայացրել, այդ թվում մեկ «չոր ասեղ» տեխնիկայով արված աշխատանք, Sputnik Արմենիայի մամուլի կենտրոնում ասաց «Մշակույթների երկխոսություն» կազմակերպության տնօրեն Սոնա Հովսեփյանը։
Ցուցահանդեսն անցկացվել է Գերմանայի Բոնն քաղաքում ապրիլի 17-ից մայիսի 5-ը։ Մշակույթների երկխոսություն» կազմակերպությունը Տիգրան Կիրակոսյանի «Վերադարձ դեպի ներկա» ցուցահանդեսով ավարտեց Հայոց ցեղասպանության 100-րդ տարելիցին նվիրված միջոցառումների շարքը։
«Ցուցահանդեսի բացմանը ողջույնի խոսքով հանդես եկավ ցուցասրահի տնօրեն Յուրգեն Միտելմանը և անդրադարձավ Հայոց ցեղասպանության 101-րդ տարելիցի թեմային։ Երեք շաբաթվա ընթացքում ցուցահանդես այցելեց 120 մարդ, ինչը լավ ցուցանիշ է այս ցուցասրահի համար», — ասաց Հովսեփյանը։
Նրա խոսքով` այցելուներին զարմացրել է այն, որ այդքան երիտասարդ նկարիչը կարողանում է այդչափ տաղանդավոր կտավներ ստեղծել։ Ցուցահանդեսի ընթացքում այցելուներին գերմաներեն լեզվով փոքրիկ բրոշյուրներ են բաժանել, որտեղ ներկայացված էր նկարչի կենսագրությունն ու այլ հետաքրքիր տեղեկություններ։
«Պակաս կարևոր չէ նաև, որ տարածաշրջանային General-Anzeiger թերթում այս ցուցահանդեսին նվիրված հոդված էր հրապարակվել։ Ցուցադրությունը պատմական ակնարկ էր խորհրդանշում և հավանաբար կանցկացվի նաև Երևանում», — նշեց Հովսեփյանը։
Նրա խոսքով` նման ցուցահանդեսները կարող են շատ բան պատմել` 120 այցելուից միայն մի քանիսն են տեղյակ եղել Հայոց ցեղասպանությունից։ Այս ցուցահանդեսի շնորհիվ Գերմանիայի շատ բնակիչներ իմացան հայ ժողովրդի այդ ողբերգական էջի մասին և ընդհանրապես, թե քարտեզի որ հատվածում է գտնվում Հայաստանը։
«Գերմանացիներին հետաքրքրում էին Հայոց ցեղասպանության տարիներին տեղի ունեցած իրադարձությունները։ Ավելին` Բունդեսթագում հունիսին կքննարկվի Հայոց ցեղասպանության ճանաչման հարցը», — Sputnik Արմենիայի հարցին պատասխանելիս` ասաց հասարակական կազմակերպության ղեկավարը։
33-ամյա նկարիչ Տիգրան Կիրակոսյանի աշխատանքներն արդեն հասցրել են հիացնել նաև Էստոնիայի և Գերմանիայի արվեստասերներին։
