ԵՐԵՎԱՆ, 11 մայիսի- Sputnik. «Հայաստանի կողմից սպիտակ ֆոսֆորի պարունակությամբ արկեր կիրառելու» վերաբերյալ Բաքվի մեղադրանքներին ի պատասխան` Հայաստանի պաշտպանության նախարարության մամուլի քարտուղար Արծրուն Հովհաննիսյանը Facebook սոցիալական ցանցի իր էջում գրել է, որ նման հայտարարությունն անհիմն է։
«Մի քանի խոսք սպիտակ ֆոսֆորի մասին. Ադրբեջանը անբարեկիրթ մոլորության մեջ է գտնվում: Բայց մեզ հասկանալի է այդպիսի պահվածքը: Ճիշտ է ասված. «վախի աչքերը մեծ են, տեսնում են այն, ինչ չկա»,- գրեց Հովհաննիսյանը։
Ավելի վաղ Ադրբեջանի տարածքների ականազերծման ազգային գործակալությունը հանդես է եկել հայտարարությամբ և նշել, որ հայկական կողմին իբր սպիտակ ֆոսֆոր պարունակող զինամթերք է կիրառել։ Բաքուն մեղադրել է Ղարաբաղի զինծառայողներին` ասելով, որ «արկն արձակվել է Հայաստանի զինված ուժերի կողմից Ասկիպար գյուղի ուղղությամբ, որը գտնվում է ղարաբաղա-ադրբեջանական զորքերի շփման գծում»։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
