ԵՐԵՎԱՆ, 10 մայիսի- Sputnik. Եվրամիությունը պատրաստ է որոշակի հանձնառություն կատարել կողմերի միջև վստահություն հաստատելու և ամրապնդելու գործում, լրագրողներին ասաց ԼՂՀ ԱԳ նախարար Կարեն Միրզոյանը Երևանում երեքշաբթի Հարավային Կովկասի և Վրաստանի ճգնաժամի հարցերով ԵՄ Հատուկ ներկայացուցիչ Հերբերտ Զալբերի հետ հանդիպումից հետո։
«ԵՄ-ն իր դերակատարության մասին բազմիցս խոսել է։ Այն իր աջակցությունն է հայտնում Մինսկի խմբի համանախագահների քայլերին, ինչպես նաև պատրաստ է որոշակի հանձնառություն ստանձնել կողմերի միջև վստահություն հաստատելու և ամրապնդելու գործում»,- ասաց Միրզոյանը։
Միաժամանակ նրա խոսքով` ստեղծված իրավիճակում Ադրբեջանն իր պահվածքով ահավոր հարված է հասցրել կողմերի միջև վստահությանը։
«Ես կարծում եմ, որ այսօր միջազգային հանրության ջանքերը պետք է ուղղված լինեն Ադրբեջանի ապակառուցողական պահվածքը չեզոքացնելուն, որն ունակ է ոչնչացնել վստահության ցանկացած նշույլ, և միայն դրանից հետո կարող ենք խոսել որոշակի ջանքերի, քայլերի մասին, որոնք ուղղված կլինեն կողմերի միջև որոշակի վստահության ձեռք բերմանը»,- նշեց Միրզոյանը։
Նա ասաց, որ Զալբերին հաղորդել է այն մասին, թե ինչ է տեղի ունեցել ապրիլի սկզբին, և ինչ հետևանքներ է ունեցել քառօրյա պատերազմը ոչ միայն բանակցային գործընթացի, այլ նաև տարածաշրջանային անվտանգության, Ղարաբաղի կյանքի վրա։
«Ես ծանուցել եմ այն մասին, որ այդ ընթացքում Ադրբեջանը մի շարք ռազմական հանցագործություններ և գործողություններ է կատարել, որոնք մարդկության դեմ գործված հանցագործություն են»,- նշեց Միրզոյանը։
Լրագրողների այն հարցին, թե ինչու հանդիպումը տեղի չի ունեցել Ղարաբաղում, նա պատասխանեց, որ իրենք մի քանի բարձրացրել է Ստեփանակերտում հանդիպում անցկացնելու գաղափարը, սակայն ադրբեջանական իշխանությունների դիրքորոշման պատճառով ԵՄ և միջազգային կազմակերպությունների ներկայացուցիչները չեն կարող այցելել Ղարաբաղ։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
