ԵՐԵՎԱՆ, 10 մայիսի- Sputnik. Թեհրանի դատախազության ներկայացուցիչ Գազի Շահրիարին երեքշաբթի հայտարարել է, որ Իրանում Թեհրան-Երևան չվերթը կատարող Տու-154Մ ինքնաթիռի կործանման պատճառները հետաքննող հանձնաժողովի եզրակացությունը վկայում է, որ ավիաաղետի մեղավորը ռուսական նախագծող ընկերությունն է և չվերթը սպասարկող անձնակազմը, հաղորդում է ՌԻԱ Նովոստին` հղում անելով IRINN հեռուստաալիքին։
Իրանի Caspian Airlines ավիաընկերության ինքնաթիռն աղետի է ենթարկվել 2009թ. հուլիսի 16-ին, Իրանի Կազվին քաղաքից ոչ հեռու, Թեհրանից մոտ 200 կմ հեռավորության վրա: Բոլոր ուղևորները և անձնակազմի անդամները զոհվել են: Ինքնաթիռում եղել է 168 մարդ` ներառյալ անձնակազմի 15 անդամները: Ինքնաթիռն իրականացնում էր Թեհրան-Երևան չվերթը:
«Իրանի քաղավիացիայի կազմակերպությանը փոխանցված հանձնաժողովի հաղորդագրության մեջ, որը զբաղվել է այդ միջադեպի հետաքննությամբ, ինքնաթիռի կործանման պատճառ է նշվում խափանումը ճնշման կոմպրեսորի փականում:
Ի վերջո, մեղավոր են համարվում ռուսական նախագծող ընկերությունը և չվերթի սպասարկման համար պատասխանատու անձնակազմը»,- մեջբերել է IRINN հեռուստաալիքը Շահրիարիին:
Նա նշել է, որ նորաստեղծ հանձնաժողովը կքննի ինքնաթիռի ձեռք բերման և շահագործման հարցում ավիաընկերության նախկին ղեկավարության անփութության գործը:
2009թ. օգոստոսի վերջին ՀՀ ՔԱԳՎ մամուլի քարտուղար Նելլի Չարչինյանը հայտնել էր, որ իրանական հանձնաժողովը, որը քննում է Տու-154Մ ինքնաթիռի կործանման պատճառները, պարզել է, որ ինքնաթիռի շարժիչը հանկարծակի խափանվել է օդում: Նա հայտարարել էր, որ ըստ հանձնաժողովի ներկայացուցչի` «ինքնաթիռը թռիչքից 24 օր առաջ տեխզննման էր ենթարկվել, խափանումներ չէին հայտնաբերվել»:
