ԵՐԵՎԱՆ, 10 մայիսի- Sputnik. Հայաստանը կարող է զենք արտադրել` չնայած ակադեմիական շրջանակների որոշ ներկայացուցիչների անվստահությանը, լրագրողներին ասաց ՀՀ խորհրդարանի փոխխոսնակ Էդուարդ Շարմազանովը։
«Մենք զրկված չենք նման հնարավորությունից»,- ասաց Շարմազանովը` մեկնաբանելով ՀՀ ԳԱԱ նախագահ Ռադիկ Մարտիրոսյանի այն կարծիքը, որ զենքի արտադրությունը բարդ և ծախսատար գործընթաց է։
Նա միաժամանակ ԶԼՄ-ներին կոչ արեց ավելի հանդուրժողական վերաբերմունք դրսևորել ԳԱԱ նախագահի հայտարարությանը։
Շարմազանովը նաև մեկնաբանեց պատգամավոր Հրանտ Բագրատյանի հայտարարությունը, որ Հայաստանը ատոմային զենք ստեղծելու հնարավորություն ունի։
Նա հայտարարեց, որ Բագրատյանի խոսքերը նրա անձնական կարծիքն են։
«Հայաստանը խաղաղասեր երկիր է, և Բագրատյանի խոսքերը նրա անձնական կարծիքն են, իսկ Հայաստանի իշխանությունների և քաղաքական վերնախավի կարծիքը պարզ է` մենք ատոմակայանն օգտագործում ենք խաղաղ նպատակներով` էներգիա արտադրելու համար»,- նշեց փոխխոսնակը։
