ԵՐԵՎԱՆ, 10 մայիսի- Sputnik. 70-ամյա Դալջինժեր Քաուրը Հնդկաստանի Հարյանա նահանգում անպտղության բուժման կլինիկայում երկամյա բուժումից հետո ծնել է առաջին երեխային, հաղորդում է ՌԻԱ Նովոստին` հղում անելով Ֆրանս Փրես գործակալությանը։
72-ամյա Քաուրի և նրա 79-ամյա ամուսնու` Մոհինդեր Սինգհ Գիլի կյանքում երջանիկ իրադարձությունը տեղի է ունեցել ապրիլի 19-ին, սակայն լրագրողներին հայտնի է դարձել այդ մասին միայն երեքշաբթի։ Ինչպես պատմել է հնդկուհին գործակալությանը տված հարցազրույցում, ընտանեկան զույգը 46 տարվա ամուսնությունից հետո գրեթե կորցրել էր երեխա ունենալու հույսը, բայց որոշել էր փորձել ԷԿԲ (էքստրակորպորալ բեղմնավորում)։
«Աստված լսեց մեր աղոթքները։ Հիմա ես զգում եմ, որ լիարժեք կյանքով եմ ապրում։ Ես ինքս եմ խնամում երեխային, ես լի եմ կենսական ուժերով։ Ամուսինս նույնպես շատ հոգատար է, նա ամեն ինչում օգնում է ինձ»,- ասել է նա։ Նորածին տղային կոչել են Արմաան։
Ըստ National Fertility and Test Tube բուժկենտրոնի`ծնվելու պահին երեխայի քաշը կազմել է երկու կիլոգրամ, հիմա տղան «ամուր է և առողջ»։ Ինչպես հայտարարեց բուժհաստատության ղեկավարը, ԷԿԲ իրականացնելու որոշումն ընդունվել է այն բանից հետո, երբ պարզվել է, որ Քաուրը կարող է ծննդաբերել երեխային։
Սա Հնդկաստանում նման առաջին դեպքը չէ։ 2008 թվականին Ութար-Փրադեշ նահանգի 72-ամյա բնակչուհին զույգ երեխա ունեցավ։
