ԵՐԵՎԱՆ, 10 մայիսի — Sputnik. Արագած Ախոյանը բազմաթիվ անգամ է եղել Թուրքիայում։ Ուսումնասիրելով այդ երկրի ներքին կյանքը` եկել է մի համոզման` երկրի ներսում գնալով ակտիվանում է քաղաքացիական հասարակությունը։
«Թուրքիայում կատարվում են պրոցեսներ, որոնք ակնհայտորեն տանում են դեպի ֆեոդալիզմ։ Կամաց-կամաց օղակը սեղմվում է ֆաշիստների շուրջ, իսկ դա միակ հենակետն է, որ Էրդողանին պահում է ոտքի վրա,-ասաց նա ու ավելացրեց,-սա ազգային փոքրամասնությունների հետ երկխոսության մեջ մտնելու հնարավորություն է տալիս»։
Ախոյանի խոսքով` այսօր Թուրքիան նման է եռացող կաթսայի։ Այս իրավիճակում նա ունի երկու ճանապարհ` մեկը տանում է դեպի ժողովրդավարություն, մյուսը` բռնապետություն։
«Որ գնան դեպի դեմոկրատիա, առաջ կգա ազգերի ինքնորոշման խնդիրը, իսկ դրան ո՛չ երկիրն է պատրաստ, ո՛չ էլ քաղաքացիական հասարակությունը։ Իսկ որպես բռնապետություն` իրենք իրենց սպառել են։ Հյուսիսարևելյան հատվածներում քաղաքացիական պատերազմ է»,-ասաց նա։
Ըստ բանախոսների` Թուրքիայում պաշտոնյաներից շատերն են ընդունում, որ 20-րդ դարի սկզբին Արևմտյան Հայաստանում իրականացվել է ցեղասպանություն, չնայած նաև խուսափում են այդ բառն օգտագործել։ Նրանցից շատերն ասում են, որ թուրքական հասարակությունը պատրաստ չէ առերեսվել պատմությանը և դրան պետք է կամաց-կամաց հասնել։
«Իրենց արտահայտությամբ` յավաշ-յավաշ, այսինքն` աստիճանաբար մոտենան այս խնդրին»,-ասաց Վահան Մելիքյանը։
Իրազեկմանն այսօր նպաստում է թուրքական ընդդիմադիր մամուլը, թեև դա նրանց վրա թանկ է նստում։ Պատահական չէր, որ Ստամբուլի հանրապետական դատախազությունը հետաքննություն էր սկսել թուրքական հայտնի «Զաման» պարբերականի գլխավոր խմբագիր Էքրեմ Դումանլըի նկատմամբ։ Իսկ այս տարի արդեն փակվեց թերթի` Անկարայում գտնվող գրասենյակը։
«Ազգային փոքրամասնությունների ու քաղաքացիական հասարակության համար Թուրքիայում նպաստավոր պայմաններ են ստեղծվել։ Դրան գումարած երկու գերտերություններին` ԱՄՆ-ին և Ռուսաստանին ձեռնտու է, որ Էրդողանի վարչակազմն ասպարեզից դուրս գա»,-ասաց Վահան Մելիքյանը։
Ի դեպ, բանախոսներն անդրադարձան նաև ԳԱԱ նախագահ Ռադիկ Մարտիրոսյանի մեկնաբանությանը` Հայաստանում ռազմարդյունաբերության ծավալման ու արդիականացման վերաբերյալ։ Նա մասնավորապես ասել էր, որ ռազմարդունաբերական բնագավառում «ամեն քոսոտ երկիր» չի կարող դուրս գալ միջազգային ասպարեզ, քանի որ այնտեղ շատ լուրջ մրցակցություն է, և այդ երկրի քիթը կտրորեն։
«Եթե նման բան է ասել, ուրեմն նրա թոշակի գնալու ժամանակն է, թող անցնի ակտիվ հանգստի»,- խոսքն այսպես եզրափակեց Արագած Ախոյանը։
