ԵՐԵՎԱՆ, 10 մայիսի — Sputnik, Լաուրա Սարգսյան. Կարմրաշեն գյուղում ծնված սպորտսմենն իր նոր ռեկորդը նվիրել է համագյուղացի ընկերոջը` Ռաֆիկ Հակոբյանին, և քառօրյա պատերազմում զոհված բոլոր զինվորներին։
Սարդարյանը որոշել է մեծ սպորտ մտնել 5 տարի առաջ, երբ հեռուստացույցով տեսել է, թե ինչպես է հայ մարզիկներից մեկը Գինեսի ռեկորդակիր դարձել` պտտաձողի վրա կատարելով 350 պտույտ։
«Այն ժամանակ ես այս մարզաձևով զբաղվում էի սիրողական մակարդակով և ընդամենը 100 պտույտ էի կարողանում կատարել», — Sputnik Արմենիայի թղթակցի հետ զրույցում ասաց Ռոմանը։
Ռոմանը սկսել է պարապել ու մարզվել շաբաթը երկու անգամ։ Եվ արդեն 2011 թվականի սեպտեմբերի 24-ին սահմանել է իր առաջին ռեկորդը` 20 րոպեում կատարելով 560 պտույտ և առաջ անցնելով մրցակցից։
«Իմ ռեկորդը գերազանցեց Դավիթ Ֆահրադյանը` 670 պտույտով, իսկ արդեն 2011 թվականի դեկտեմբերի 16-ին ես գերազանցեցի բոլոր ռեկորդները և կատարեցի 1001 պտույտ 36 րոպեում», — ասաց Ռոմանը։
Հաջորդ տարիների տքնաջան աշխատանքն էլ նոր պտուղներ տվեց. արդեն 2014 թվականի ապրիլին նա ռեկորդակիր դարձավ` մեկ րոպեում կատարելով 41 պտույտ։ 2015 թվականին կրկին գերազանցեց սեփական ռեկորդը` պտույտների քանակն ավելացնելով 4-ով։ Գինեսի ռեկորդների գրքում նրա անվան դիմաց գրվեց պտույտների ռեկորդային նոր թիվը` 45։
Սահրադյանը նշեց, որ մարզաձևն իր դժվարություններն ունի, իսկ հաջողության հասնելու համար շատ ջանք ու ժամանակ է պետք, սակայն մարզիկի ճանապարհը դյուրին է դարձել բնությունից տրված ուժի շնորհիվ։
«Պապս ու հայրս նույնպես սպորտսմեններ են եղել։ Բայց շատ ավելի կարևոր է, որ մարդն անընդհատ մարզվի, համբերատարությամբ զինվի ու ուժեղ կամք դրսևորի», — ասաց Ռոմանն ու կոչ արեց երիտասարդներին զբաղվել «սթրիթ վորքաութով» (փողոցներում իրականացվող ուժային մարզումներ)։
