Գյումրու «Մայր Հայաստան» հուշահամալիրի տարածքն այսօր բազմամարդ էր մայիսյան հաղթանակների կապակցությամբ: Մարզային և քաղաքային իշխանությունների ներկայացուցիչները, Շիրակի թեմի առաջնորդը, ԱԺ պատգամավորները հարգանքի տուրք մատուցեցին Հայրենական մեծ պատերազմում զոհված հերոսներին և ծաղկեպսակ դրեցին Անմար կրակի մոտ:
Ինչպես միշտ, միջոցառմանը ներկա էին նաև պատերազմի վետերանները, չնայած նրանց շարքերը տարեցտարի նոսրանում է: Տոնի առթիվ ներկաներին շնորհավորեցին Շիրակի մարզպետ Հովսեփ Սիմոնյանը և Գյումրու քաղաքապետ Սամվել Բալասանյանը, իսկ վետերանների անունից ելույթ ունեցավ բազմավաստակ երկաթուղային Արտուշ Տոնոյանը: Շնորհավորանքից հետո ՀՀ և ՌԴ միացյալ զորախմբավորումների և ուժերի շտաբի պետի` գնդապետ Դավիթ Աղաջանյանի հրամանատարությամբ տեղի ունեցավ ՀՀ և ՌԴ զինված ուժերի՝ ՀՀ ՊՆ Շիրակի կայազորի և Գյումրիում տեղակայված 102-րդ ռազմակայանի և սահմանապահ ջոկատի զինվորների համատեղ շքերթը:
