ԵՐԵՎԱՆ, 9 մայիսի — Sputnik. Մենք երբեք թույլ չենք տա վերաշարադրել պատմությունը, ասել է Սերժ Սարգսյանը։
«Մենք երբեք մեր երկրում որևէ մեկին թույլ չենք տա վերադասավորել իրադարձությունները, այս հաղթանակը բոլորիս հաղթանակն է, և ուզում եմ մի բանում էլ վստահ լինեք, որ ինչպես դուք եք պաշտպանել ձեր, մեր մեծ հայրենիքը, ձեզնից հետո եկող սերունդները նույնպես պաշտպանելու են մեր փոքրիկ, բայց շատ թանկագին հայրենիքը», — ասել է Սարգսյանը։
Նրա խոսքով` հաղթանակները տարբեր են լինում, կարող ես աչք դնել ուրիշի հողի վրա, ուրիշի ունեցվածքի վրա, գնալ ու հաղթել, բայց դա արդար հաղթանակ չէ։
«Ձեր հաղթանակը արդար հաղթանակ էր։ Ձեզնից հետո եկողներին պարտադրեցին, որպեսզի իրենք էլ լինեն այդպիսին, միգուցե սա շատ ավելի շատ կարևոր էր, շատ շնորհակալ եմ», — նշել է նախագահը։
Հայրենական մեծ պատերազմին մասնակցել է շուրջ 600 հազար հայ. մոտ 300 հազարը` Հայաստանից, ևս 200 հազարը` մյուս հանրապետություններից, շուրջ 100 սփյուռքահայ կռվում էր դաշնակիցների զորքերի կազմում։ Նրանցից մոտ 200 հազարը զոհվեց մարտերում։ Պատերազմի տարիներին 99 հայ Խորհրդային Միության Հերոս դարձավ, իսկ լեգենդար օդաչու Նելսոն Ստեփանյանն ու Խորհրդային Միության Մարշալ Հովհաննես Բաղրամյանը այդ կոչմանն արժանացան երկու անգամ։
Բացի այդ, 26 հայ Փառքի շքանշանի ասպետ դարձավ։ Երկրորդ Համաշխարհային պատերազմի ամենաականավոր զորահրամանատարներն էին Խորհրդային Միության կրկնակի հերոս մարշալ Հովհաննես Բաղրամյանը, Խորհրդային Միության հերոս, զրահատանկային զորքերի գլխավոր մարշալ Համազասպ Բաբաջանյանը, ավիացիայի մարշալ Սերգեյ Խուդյակովը (Արմենակ Խանփերյանց), Խորհրդային Միության հերոս, ԽՍՀՄ նավատորմի ադմիրալ Հովհաննես Իսահակյանը։ Հայ ժողովուրդը նախապատրաստել և ռազմաճակատ է ուղարկել 6 մոտոհրաձգային դիվիզիա, իսկ 89-րդ դիվիզիան (Թամանյան) հասավ մինչև Բեռլին։
